Dirijor Əyyub Quliyevin İtaliya və İspaniya turnesi anşlaqla keçib
Arturo Toskanini adına
dirijorların IX Beynəlxalq müsabiqəsinin qalibi, Azərbaycan
Dövlət Akademik Opera və Balet Teatrının dirijoru Əyyub
Quliyevin rəhbərliyi ilə dünya şöhrətli Toskanini
Filarmonik Orkestrinin İtaliya və İspaniyada konsert turnesi
keçirilib. Konsertlər İtaliyanın Mədəniyyət
Nazirliyi, Roma Dövlət Filarmoniyası, Toskanini Fondu, “Musica
İnsieme” Fondu (Bolonya), Madriddəki İtaliya Mədəniyyəti
İnstitutu və İspaniyanın Zərif Sənətlər
Akademiyası tərəfindən təşkil olunub.
Toskanini Filarmonik Orkestrinin konsert
turnesi məşhur italyan dirijoru və bəstəkarı
Cüzeppe Sinopolinin xatirəsinə həsr edilib. İlk
konsert aprelin 14-də Romada, “Teatro Olimpiko”da gerçəkləşib.
Böyük marağa səbəb olan konsert İtaliya Dövlət
Radiosunun (RAI 3) efirində canlı yayımlanıb.
Aprelin 15-də İspaniyanın
paytaxtı Madridin “Kolumnas” Teatrında Əyyub Quliyevin Toskanini
Filarmonik Orkestri ilə konserti olub. Növbəti konsertlər
aprelin 17-də İtaliyanın Parma şəhərinin
“Paqanini Auditorium” zalında, ayın 18-də isə Bolonya
şəhərinin G.Mansoni Opera Teatrında keçirilib. Anşlaqla
keçən konsertlər İtaliyanın kütləvi
informasiya vasitələrində (“Gazetta di Parma”, “Musica Insieme”
və “Corriere Della Sera”) geniş
işıqlandırılıb.
Mədəniyyət.-
2011.- 20 aprel.- S. 7.