Göygöl rayonunun uşaq xoru Almaniyaya səfər edib
Son
vaxtlar Azərbaycan xalqının tarix və mədəniyyətinin
dünyaya layiqincə təqdim olunmasında
respublikamızın ayrı-ayrı bölgələri də
fəallıq göstərir.
Vaxtilə Azərbaycana pənah gətirmiş
almanlar tərəfindən əsası qoyulan Helenendorf - indiki
Göygöl şəhəri buna gözəl nümunədir.
Azərbaycan-alman tarixi dostluğunu özündə yaşadan
Göygöl şəhəri iki xalq arasında mədəni əlaqələrdə
körpü rolunu oynayır. Göygöl rayonundan
seçilmiş millət vəkili Rövşən Rzayevin təşəbbüsü
ilə Göygöl-Helenendorfun yaranma tarixi hər ilin avqustunda
«Şəhər günü» tədbirləri ilə qeyd
edilir. 2009-cu ilin avqustunda Göygöl-Helenendorfun
yaranmasının 190 illiyi münasibətilə “Şəhər
günü” tədbirləri xüsusilə geniş qeyd olunmuşdu.
Yubiley şənliklərinə Almaniyanın Baden-Vürtemberq
federal torpağının baş naziri Günter Oettingerin
başçılığı ilə nümayəndə heyəti
gəlmişdi. Azərbaycanın mədəniyyət və
turizm naziri Əbülfəs Qarayevin də iştirak etdiyi tədbirlərin
yaddaqalan məqamlarından biri Göygöldəki alman
kirxasında rayonun simli alətlərdən ibarət simfonik
orkestrinin və məktəblilərin xor kollektivinin
çıxışları olmuşdu. Konsert qonaqlarda
böyük təəssürat doğurmuş, G.Oettinger musiqi
kollektivlərini Almaniyada görmək arzusunu bildirmişdi.
Aprelin 24-də Göygöl rayon 7
illik musiqi məktəbinin 21 nəfərlik uşaq xor
kollektivi Almaniyaya gedib. Nümayəndə heyətinin rəhbəri,
rayon İcra Hakimiyyəti başçısının
müavini Kəmalə İbrahimova bildirib ki, səfər
proqramına uşaq xorunun Ştutqart və digər şəhərlərdə
çıxışları daxildir.
Səfər Almaniya dövlətinin
maliyyə dəstəyi, Azərbaycanın Almaniyadakı və
Almaniyanın Azərbaycandakı səfirliklərinin təşkilatçılığı
və tanınmış qafqazşünas alim, Berlindəki
Humboldt Universitetinin “Azərbaycan tarixi” kafedrasının
müdiri, professor Yeva Mariya Auxun köməyi ilə
reallaşıb. Səfərin nəqliyyat xərcini AZAL
şirkəti üzərinə götürüb.
Mədəniyyət.-
2011.-29 aprel.- S. 5.