Vaqif Mustafazadənin xatirəsi yad edildi

Dekabrın 16-da görkəmli musiqiçi Vaqif Mustafazadənin (1940-1979) vəfatının 32-ci ildönümü ilə bağlı onun ev-muzeyində xatirə tədbiri keçirilib. Vaqif Mustafazadənin ev-muzeyinin direktoru, onun adını daşıyan xeyriyyə fondunun sədri Afaq Əliyeva sənətçinin anım gününə gəlmiş qonaqları salamlayıb, musiqiçinin həyat və yaradıcılığından söz açdı.

Tanınmış musiqiçilər - Xalq artisti Natəvan Şeyxova, əməkdar incəsənət xadimləri Faiq Sücəddinov, Vaqif Gərayzadə, əməkdar artistər Rafiq Seyidzadə, Akif Süleymanbəyli, caz musiqisinin gözəl bilicilərindən Rahib Azəri Vaqif Mustafazadə sənəti barədə ürək sözlərini, xatirələrini bölüşdülər. Onlar təkcə Vaqiflə bağlı xatirələrini deyil, həm də o dövrün Bakısının ab-havasını çatdırmaq istəyirdilər. Xatirələr, söhbətlər bir-birini əvəz etdikcə sanki Vaqifin ruhu da otaqlarda pərvaz edir, şadlanırdı. Qeyd olundu ki, Vaqif Mustafazadə yaradıcılığı bizdən sonrakı nəsillər üçün böyük örnək olacaq.

Xatirələr çözələndikcə musiqiyə də ehtiyac duyulurdu. Çıxışlar arasında Vaqif Mustafazadənin uşaqlıq dostu, 28 saylı şəhər poliklinikasının baş həkimi Alik Nəzərovun, bəstəkar Faiq Sücəddinovun, Emil Əfrasiyabın və Kövkəb Səfərəliyeva adına 16 saylı musiqi məktəbinin şagirdi Heydər Məmmədovun ifa etdiyi kompozisiyalar tədbirə xüsusi rəng qatdı.

Cazda yeni bir istiqamətin - Azərbaycan caz-muğamının banisi olan Vaqif Mustafazadə haqqında indiyədək çox yazılıb, çox deyilib. O, qısa sənət həyatında caz musiqisində özünəməxsus iz qoyub. Orijinal kompozisiyaları - zəngin Şərq koloriti, uğurlu improvizələr, muğam və caz ritmlərinin uzlaşdırılması sayəsində Vaqif sağlığında əfsanəyə çevrilmişdi. Onun xatirəsi bu həm doğma vətənində, həm də xarici ölkələrdə yüksək qiymətləndirilir.

Lalə

Mədəniyyət.- 2011.- 21 dekabr.- S. 15.