Ağadadaş Qurbanovun 100 illik yubileyi doğma teatrında qeyd olundu

Dekabrın 20-də Mədəniyyət və Turizm Nazirliyinin dəstəyi ilə Gənc Tamaşaçılar Teatrında görkəmli sənətkar, unudulmaz teatr və kino aktyoru Xalq artisti Ağadadaş Qurbanovun anadan olmasının 100 illiyinə həsr olunmuş yubiley gecəsi keçirildi.

Gənc aktyorlar Günel Məmmədova və Elnur Kərimovun aparıcılıq etdiyi tədbiri teatrın direktoru, Əməkdar artist Mübariz Həmidov açaraq, Azərbaycanın teatr tarixində silinməz iz qoymuş sənətkarların yubileylərinin keçirilməsinin böyük önəm kəsb etdiyini vurğuladı. Ağadadaş Qurbanovun Gənc Tamaşaçılar Teatrının qurucularından biri olduğunu, onun sənət yolunun böyük hissəsinin bu teatrda keçdiyini xatırlatdı: “Biz bu tədbirə hazırlaşarkən çox həyəcan keçirirdik. Çünki Ağadadaş Qurbanovun yaradıcılığından danışarkən eyni zamanda teatrımızın tarixinə nəzər salmalıyıq. Görkəmli sənətkarı xatırlarkən onun sənətə bağlı övladlarından da mütləq söz açmalıyıq. Təəssüf ki, onlardan ikisi dünyasını dəyişib. Gülşən Qurbanova bu səhnədə neçə-neçə obrazlara səhnə həyatı verib. Onun tamaşalarını çox gözəl xatırlayıram. Ağadadaş Qurbanovun oğlu Hamlet Qurbanov Akademik Milli Dram Teatrında çalışıb. Hər ikisi həyatdan vaxtsız getmişlər. Yaşasaydılar daha neçə-neçə maraqlı obrazlarla tamaşaçıların qarşısına çıxacaqdılar».

Teatr Xadimləri İttifaqının sədri, Xalq artisti Azər Paşa Nemət Ağadadaş Qurbanovun teatr sənətinin inkişafındakı xidmətlərindən, Gənc Tamaşaçılar Teatrındakı fəaliyyətindən söz açdı: «Ağadadaş Qurbanov deyəndə böyük sənət dövrü göz önünə gəlir. Gənc Tamaşaçılar Teatrı indiki Aktyor Evi olan məkanda yerləşirdi. Mən balaca uşaq ikən ilk dəfə Ağadadaş Qurbanovu orda görmüşəm. Mənim üçün bu gün burda çıxış etmək böyük şərəfdir. Heç düşünməzdim ki, zaman gələcək, onun haqqında söz deyəcəyəm. O, çox gözəl, maraqlı insan idi. Atam Zəfər Nemətovu bu teatra sövq edən də Ağadadaş Qurbanov olub. Mənim üçün o Ağadadaş «əmi» olub. Çox səmimi və mehriban olduğundan onu özümə doğma bilmişəm. Sonralar Gənc Tamaşaçılar Teatrında Gülşən Qurbanova, Akademik Milli Dram Teatrında isə Hamlet Qurbanovla birgə işləmişik».

Natiq uşaqlıq illərini də xatırlayaraq, məktəbdə dəcəlliyinə görə tənbeh edilərkən kömək üçün həmişə “Ağadadaş əmi”yə müraciət etdiyini dedi.

Xalq artisti Ağaxan Salmanlı A.Qurbanovun pərəstişkarı olduğunu, onun sağlığında böyük xalq məhəbbəti qazandığını bildirdi: «Onu əsasən «Şeyx Sənan», «Şirvan gözəli», «Mariya Tüdor» tamaşalarında görüb, pərəstiş etmişəm. Teatrın kollektivində elə bir insan yox idi ki, onu sevməsin. Çünki heç vaxt, heç kimin xətrinə dəyməyib. Səmimiliyi ilə hamının qəlbinə yol tapırdı».

Daha sonra Xalq artisti Rafiq Əzimov, kinoşünas, Əməkdar incəsənət xadimi Aydın Kazımzadə çıxış edərək, A.Qurbanov haqqında fikirlərini dilə gətirdilər, onun yüksək insani keyfiyyətlərindən danışdılar.

Tədbirdə həmçinin A.Qurbanovun çəkildiyi filmlərdən kadrlar nümayiş etdirilərək, oynadığı rollar Gənc Tamaşaçılar Teatrının aktyorlarının ifasında canlandırıldı.

Qeyd edək ki, teatrın foyesində aktyorun yaradıcılığını əks etdirən guşə yaradılıb.

Gülər

Mədəniyyət.- 2011.- 23 dekabr.- S. 11.