Xalq dilinin abidəsi - Əli Vəliyev

Dekabrın 26-da Akademik Milli Dram Teatrında Azərbaycan ədəbiyyatının görkəmli nümayəndələrindən biri, Xalq yazıçısı Əli Vəliyevin 110 illik yubileyi qeyd olundu. Mədəniyyət və Turizm Nazirliyinin təşkilatçılığı ilə keçirilən tədbirdə əvvəlcə yazıçının həyat və yaradıcılığını əks etdirən videomaterial nümayiş etdirildi.

Xalq şairi Sabir Rüstəmxanlı, AMEA-nın müxbir üzvü Nizami Cəfərov, yazıçı-publisist Aqil Abbas, professorlar Nizaməddin Şəmsizadə, Qulu Məhərrəmli, yazıçı-publisist Flora Xəlilzadə, filologiya elmləri doktoru Şirindil Alışanov, yazıçı Nahid Hacızadə çıxış edərək Əli Vəliyevin özünəməxsus ədəbi irsindən, bütöv şəxsiyyətindən söz açdılar. Qeyd olundu ki, keşməkeşli və məşəqqətli həyat yolu keçən Əli Vəliyev tanınmış nasir, publisist, yazıçı kimi mənsub olduğu xalqın böyük bir dövrünün salnaməsini yazmış, “Zəngəzur qartalları”, “Budağın xatirələri”, “Qarabağda qalan izlər” əsərlərində ulu yurd yerlərimizi əbədiləşdirmişdir.

Xalq yazıçısı, akademik Mirzə İbrahimov Əli Vəliyev barədə yazırdı:

“O, xeyirxah, qeyrətli bir vətəndaş, həyatla, xalqla canlı əlaqəsi olan bir yazıçı idi, vəfalı dost idi. Sinəsində bütün həyatı boyu doğma xalqına, vətəninə, bədii ədəbiyyata, həqiqətə, düzlüyə məhəbbətlə dolu olan və rahatlıq bilməyən bir ürək döyünürdü...”

Əli Vəliyevin yaradıcılığı ilə şəxsiyyəti bir-birini tamamlayırdı. Xalq şairi Mirvarid Dilbazi ədib barədə yazırdı: ““Kişi” kəlməsi dilimizdə ən yüksək məna daşıyır. Mərdliyi, cəsarəti, doğruluğu tərənnüm edir. Bu keyfiyyətlərə malik olduğu üçün Əli Vəliyevə də xalqımızın kişi oğlu desək, yerinə düşər. O, həqiqət naminə danışmaq lazım gələn yerdə, ən çətin, ən çıxılmaz məqamlarda dönə-dönə bu kişi ləyaqətini göstərirdi...”

Əli Vəliyev bütün varlığı ilə xalqa bağlı olmuş, dilimizin gözəlliyi, xalqımızın adət və ənənələrini, tarixini yüksək sənətkarlıqla qələmə almışdır. Nəsrin bütün janrlarında özünü sınayan Əli Vəliyev ancaq gördüklərini, duyduqlarını, şahidi olduqlarını qələmə aldığından onun yaradıcılığı ölümsüz ədəbi nümunələrdəndir.

“Nənəmin cəhrəsi”, “Madarın dastanı”, “Qarlı dağlar”, “Budağın xatirələri, “Qəhrəman”, “Sovqat”, “Gülşən”, “Çiçəkli”, “Ürək dostları”, “Zamanın ulduzları”, “Turaclıya gedən yol”, “Anaqız”, “Bir cüt ulduz”, “Samovar tüstülənir”, “Durna qatarı”, , “Zəngəzur qartalları”, “İşığa doğru” kitablarındakı hekayələr, povestlər və romanlar həyatın bir parçası olduğundan oxucunun qəlbinə yol tapır, onu real hadisələrin, olmuş əhvalatların axarına alıb aparır.

Gecədə çıxış edənlər Əli Vəliyevin II Dünya müharibəsində sovet ordusunun tərkibində Krım cəbhəsində yazıçı-jurnalist kimi çalışmasından, “Kommunist” qəzetində redaktor kimi fəaliyyətindən və ən əsası şəxsiyyət kimi ağır repressiya illərində ziyalılara qahmar çıxan, onları ölümün pəncəsindən xilas edən xidmətlərindən danışdılar.

Gecədə çıxış edənlər Əli Vəliyevin dünyasını vaxtsız dəyişmiş oğlu - ədəbi tənqiddə sərt və obyektiv yazı müəllifi kimi tanınmış Məsud Əlioğlundan da söz açdılar.

Yubiley gecəsində Əli Vəliyevin əsərlərindən parçalar səsləndirildi, tanınmış xanəndələrin ifasında maraqlı musiqi nömrələri təqdim olundu. Ədibin ailəsi adından nəticəsi Leyla Ağayeva çıxış edərək tədbirin təşkilatçılarına və iştirakçılarına minnətdarlığını bildirdi.

Təranə Vahid

Mədəniyyət.- 2011.- 28 dekabr.- S. 5.