Bakı Musiqi Akademiyasının 90 illiyi qeyd edildi

Dekabrın 26-da Üzeyir Hacıbəyli adına Bakı Musiqi Akademiyasının 90 illik yubileyi münasibətilə təntənəli tədbir keçirildi. Tədbirdə hökumət rəsmiləri, millət vəkilləri, tanınmış musiqiçilər, mədəniyyət və incəsənət xadimləri iştirak edirdi.

Tədbirdə çıxış edən təhsil naziri Misir Mərdanov Bakı Musiqi Akademiyasının kollektivini yubiley münasibətilə təbrik etdi. Musiqimizin inkişafında bu təhsil ocağının mühüm rolunu vurğuladı. Qeyd ki, bu yubiley respublikamızın musiqi, incəsənət xadimləri üçün bir bayramdır.

Mədəniyyət və turizm naziri Əbülfəs Qarayev yubiley tədbirində görkəmli musiqiçiləri bir arada gördüyünə şad olduğunu bildirdi: “Gördüyünüz işin bəhrəsi odur ki, Azərbaycan musiqisinin, mədəniyyətinin səs-sorağı bütün dünyadan gəlir. Qeyd edim ki, Bakı Musiqi Akademiyası ilə Mədəniyyət və Turizm Nazirliyi arasındakı geniş əlaqələr var. Layihələrdə bərabər çalışmağımız onu sübuta yetirir ki, bu təhsil ocağında hazırlanan kadrlar həqiqətən böyük işlər görməyə qadirdirlər. Bu təhsil ocağının yetirmələri Azərbaycan mədəniyyətinin tarixini yazan insanlardır. Bu gün Azərbaycan mədəniyyəti hüdudları aşaraq dünya mədəniyyətində özünəməxsus yer tutur. Bu işlərin görülməsində Heydər Əliyev Fondunun, ölkəmizin birinci xanımı Mehriban xanım Əliyevanın müstəsna rolunu qeyd etmək istərdim. Akademiyanın məzunları, musiqiçilər bu layihələrdə mədəniyyətimizi bacarıqla təmsil edirlər”.

Nazir Bakı Musiqi Akademiyasının bu günlərdə ölkə prezidentinin sərəncamları ilə təltif olunmuş əməkdaşlarını təbrik etdi, əlamətdar yubiley münasibətilə bütün kollektivə xoş arzularını çatdırdı.

Üzeyir Hacıbəyli adına Bakı Musiqi Akademiyasının rektoru, Xalq artisti, professor Fərhad Bədəlbəyli yubiley tədbirinə gələnləri “Üzeyir bəyin ocağına xoş gəlmisiniz!” sözləri ilə salamladı. Prezident İlham Əliyevin sərəncamı ilə BMA yubileyinin dövlət səviyyəsində qeyd olunduğunu bildirən rektor bu sərəncamın ümumilikdə musiqi mədəniyyətimizə yüksək dövlət qayğısının nümunəsi olduğunu vurğuladı. Vaxtilə bu təhsil ocağında yetişmiş görkəmli musiqiçiləri xatırlayan rektor Musiqi Akademiyasının fəaliyyətindən, Azərbaycanın zəngin musiqi irsinin formalaşmasına verdiyi töhfələrdən danışdı.

Daha sonra prezident İlham Əliyevin sərəncamı ilə təltif olunan Bakı Musiqi Akademiyasının əməkdaşlarına fəxri ad, orden və medallar təqdim olundu.

Yubiley tədbiri Bakı Musiqi Akademiyasının tələbə kamera orkestrinin ifası ilə başa çatdı.

Reyhan

Mədəniyyət.- 2011.- 28 dekabr.- S. 3.