Şabran, Lənkəran və İsmayıllı

2011-ci ildə Azərbaycanın əfsanələr, folklor və sənətkarlıq “paytaxt”ları elan olundu

Azərbaycan Respublikası Mədəniyyət və Turizm Nazirliyi tərəfindən təsdiq edilmiş “2010-2014-cü illər üçün Xalq Yaradıcılığı Paytaxtları” Proqramının icrası ilə bağlı 2011-ci il üçün diyarşünaslıq, folklor və sənətkarlıq nominasiyaları üzrə yeni “paytaxt” şəhərlərin adları açıqlanıb.

Qeyd edək ki, “2010-2014-cü illər üçün Xalq Yaradıcılığı Paytaxtları” Proqramın ölkəmizin qeyri-maddi mədəni irsinin qorunması, dəstəklənməsi, xalq yaradıcılığının təbliği və təşviqi istiqamətində aparılan islahatların davamı olaraq milli folklor ustaları və kollektivlərinin, sənətkarların, milli adət-ənənələrin və eyni zamanda, respublikanın şəhər və rayonlarının beynəlxalq səviyyədə tanıdılması, daxili və xarici turizmin inkişafı məqsədilə qəbul olunub.

Proqrama əsasən, 2010-cu ildə Gəncə “Azərbaycanın əfsanələr paytaxtı”, Qazax “Azərbaycanın folklor paytaxtı”, Şəki isə “Azərbaycanın sənətkarlıq paytaxtı” elan edilmişdi. Proqramla əlaqədar 2011-ci il üçün diyarşünaslıq, folklor və sənətkarlıq nominasiyaları üzrə paytaxtların seçilməsi üçün 20-dən artıq şəhər namizədliyini irəli sürüb. Təqdim olunmuş təkliflər müvafiq namizəd şəhərlərin ümumi hazırlığı, tarixi ənənələri və digər amillər nəzərə alınmaqla təhlil edilib.

Nəticədə 2011-ci il üçün Şabran şəhəri “Azərbaycanın Əfsanələr Paytaxtı”, Lənkəran şəhəri “Azərbaycanın Folklor Paytaxtı”, İsmayıllı şəhəri isə “Azərbaycanın Sənətkarlıq Paytaxtı” elan edilib.

Bununla bağlı il ərzində Şabran, Lənkəran və İsmayıllı şəhərlərində nominasiyalara uyğun olaraq təntənəli mərasimlərin, respublika və beynəlxalq səviyyəli elmi-praktiki konfransların, dəyirmi masaların, konsertlərin, müsabiqələrin, festivalların, sərgilərin, yarmarkaların, infoturların və sair tədbirlərin təşkili nəzərdə tutulur.

Mədəniyyət.- 2011.- 2 fevral.- S. 3.