“Xalçada
yeni nəfəs”
Fevralın 2-də Lətif Kərimov adına Azərbaycan
Xalçası və Xalq Tətbiqi Sənəti Dövlət
Muzeyində “Xalçada yeni nəfəs” adlı sərginin
açılışı oldu. Gənclər Gününə
həsr olunmuş sərgidə Azərbaycan Dövlət Rəssamlıq
Akademiyası tələbələrinin müxtəlif adlarda
28 xalça eskizi nümayiş olunur.
Tədbirdə
çıxış edən muzeyin direktoru Röya
Tağıyeva əlamətdar gün münasibətilə gəncləri
təbrik etdi. Onun sözlərinə görə, sərginin məqsədi
mədəniyyətlərarası dialoqda xalçanın
rolunu, qədim ənənələrə malik milli xalça
sənətinə gənclərin münasibətini
nümayiş etdirməkdir: “Azərbaycan
xalçaçılıq sənəti inkişafının
yeni mərhələsini yaşayır. Gənclərimiz
xalqımızın qədim və zəngin sənət
növlərindən olan xalçaçılıq sənətini
qorumaqla yanaşı, ona yeni nəfəs veriblər. Bu da
xalça sənətinin bir daha bitib tükənməyən
zənginliyindən xəbər verir. Hər dəfə ona
müraciət edildikdə yeni məqamlar ortaya
çıxır. Azərbaycan xalçalarında
keçmişlə müasirliyin harmoniyası öz əksini
parlaq şəkildə tapır”.
Dövlət Rəssamlıq
Akademiyasının müəllimlərindən Məmmədhüseyn
Hüseynov, Natiq Səfərov, Tariyel Bəşirli xalça
sənətinin qədim ənənələri, sərgi
müəlliflərinin yaradıcılıqları ilə
bağlı fikirlərini bölüşdülər. Qeyd
olundu ki, Azərbaycan mədəniyyəti və incəsənətinin
təbliğinə gənclərin cəlb olunmasında belə
sərgilərin əhəmiyyəti böyükdür. Buradakı
eskizlərdə dünyanın müqəddəs
varlığı olan ananın övladına məhəbbəti,
həmçinin insanın gündəlik ritmik həyatının
müxtəlif çalarları təsvir olunub. Gənclərin
əsərlərinin bir qismində isə insanların
zaman-zaman düşündükləri hissləri rəng
çalarları vasitəsilə fəsillərə
oxşadıblar. Çıxış edənlər sərginin
gənc müəlliflərinə yeni yaradıcılıq
uğurları arzuladılar.
C.Zərbəliyev
Mədəniyyət.-
2011.- 4 fevral.- S. 8.