“Əməyimizə verilən yüksək qiymət bizi daha əzmlə işləməyə ruhlandırır”

Xəbər verdiyimiz kimi, Azərbaycan Respublikasının Prezidenti İlham Əliyev fevralın 8-də Mədəniyyət və Turizm Nazirliyinin bir qrup əməkdaşının fəxri ad və medallarla təltif edilməsi barədə sərəncam imzalayıb. Təltif olunanları bir daha təbrik edir, gələcək fəaliyyətlərində uğurlar arzulayırıq. Dövlət təltifinə layiq görülmüş şəxsləri oxucularımızla daha yaxından tanış edirik.

Mahir Qəhrəmanov

(«Tərəqqi» medalı ilə təltif olunub)

1959-cu ildə İmişli rayonunda anadan olub. Azərbaycan Pedaqoji Xarici Dillər İnstitutunu ingilis və fransız dilləri müəllimi ixtisası üzrə bitirib. 1984-1992-ci illərdə SSRİ Dövlət Turizm Komitəsinin Bakı şöbəsində inspektor vəzifəsində çalışıb. 1992-1994-cü illərdə Nazirlər Kabineti yanında Xarici Turizm Şurasının direktoru, 1994-1997-ci illərdə isə «Azərtur» turizm müəssisəsində 1-ci dərəcəli inspektor işləyib. 1997-ci ildə Dövlət Əmlak Komitəsinin İşlər İdarəsinin rəisi təyin olunub, 1999-cu ilə qədər həmin vəzifədə işləyib. 2000-2001-ci illərdə «İnturist» mehmanxanasının Xidmət bürosunun müdiri, Nazirlər Kabineti yanında Xarici Turizm Şurasında şöbə müdiri vəzifələrində çalışıb. 2001-2006-cı illərdə Gənclər, İdman və Turizm Nazirliyində aparıcı və baş mütəxəssis işləyib. 2006-cı ildən Mədəniyyət və Turizm Nazirliyinin Turizm şöbəsində işləyir. Hazırda daxili turizmin inkişafı sektorunun müdiridir.

İstanbulda keçirilən beynəlxalq turizm sərgisində ölkəmizi təmsil edən M.Qəhrəmanov xoş xəbəri də elə orada alıb. Onun dediklərindən: «2011-ci ilin «Turizm ili» elan edilməsi ilə bu xəbərin üst-üstə düşməsi məndə ikiqat sevinc yaratdı. İnsan əməyinə qiymət verildiyini gördükdə daha da ruhlanır. Bu təltifə görə ölkə başçısına dərin təşəkkürlərimi bildirirəm».

Zülqədər Cəfərov

(«Dövlət qulluğunda fərqlənməyə görə» medalı ilə təltif olunub)

1956-cı ildə Bərdə rayonunun Molla İsalar kəndində dünyaya gəlib. 1982-ci ildə Azərbaycan İnşaat Mühəndislər İnstitutunu bitirib. 1978-1979-cu illərdə «Bakıbaştikinti» İdarəsində texnik, baş texnik və mühəndis vəzifələrində çalışıb. 1982-1997-ci illərdə Mədəniyyət Nazirliyinin Əsaslı Tikinti İdarəsində mühəndis, 1997-2002-ci illərdə «Teomontaj» Dövlət Kiçik Müəssisəsində və «Texno» şirkətində mühəndis, 2002-2006-cı illərdə isə Mədəniyyət Nazirliyində baş mütəxəssis və böyük məsləhətçi işləyib. 2006-cı ildən Mədəniyyət və Turizm Nazirliyinin İnvestisiya və texniki proqramlar şöbəsinin Təmir-tikinti və bərpa layihələrinin idarə olunması sektorunun müdiridir.

Z.Cəfərov bu təltifi böyük sevinclə qarşıladığını deyir: «Sevincimin həddi-hüdudu yoxdur. Möhtərəm prezidentimizə və cənab nazirə təşəkkür edirəm».

Olqa Borislavovna Qaloçkina

(“Dövlət qulluğunda fərqlənməyə görə” medalı ilə təltif olunub)

Bakıda anadan olub, ali təhsillidir. Moskva Sosial Əlaqələr və Əmək Akademiyasının Sosial İqtisadiyyat İnstitutunu bitirib. 1983-1984-cü illərdə Layihə İnstitutu «Azərkommunlayihə»də texnik vəzifəsində çalışıb. 1984-cü ildən 1992-ci ilə qədər “Azərxalça” İstehsalat Birliyi HİK-də baş mühasib və Yerli sənaye və kommunal məişət müəssisələri fəhlələri Həmkarlar İttifaqının AR Komitəsi Maliyyə şöbəsində təlimatçı işləyib. 1992-1995-ci illərdə Dövlət Sosial Müdafiə Fondunun Nərimanov rayon şöbəsində müfəttiş vəzifəsində çalışıb. 1995-ci ildə Gənclər və İdman Nazirliyində aparıcı mühasib təyin edilib. 2006-cı ildən isə Mədəniyyət və Turizm Nazirliyində işləyir. Hazırda Maliyyə-iqtisadiyyat şöbəsində müdir müavini və baş mühasibdir.

Olqa Borislavovna təəssüratlarını bizimlə bölüşərkən bildirdi ki, xəbər onun üçün gözlənilməz olsa da, çox sevinib: «Heç bilmirəm, nə deyim. Etiraf edim ki, bu, həyatımda aldığım ən xoş xəbərlərdən biridir».

Fərrux Məsimov

(«Tərəqqi» medalı ilə təltif olunub)

1939-cu ildə Gürcüstanın Marneuli rayonunun Qaçağan kəndində anadan olub. 1988-1989-cu illərdə Dövlət İncəsənət İnstitutunda anbardar, Dövlət Rəsm Qalereyasında təsərrüfat müdiri vəzifələrində çalışıb. Sonra Mədəniyyət Nazirliyinin İşlər İdarəsinə rəis müavini təyin edilib. 1991-1992-ci illərdə Azərbaycan Dövlət Rəsm Qalereyasının direktor müavini işləyib. 1992-1993-cü illərdə fəaliyyətini «Şəfəq» Bədii İstehsalat Müəssisəsində istehsalat şöbəsinin rəisi kimi davam etdirib. 1993-cü ildən 2006-cı ilə qədər Mədəniyyət Nazirliyində müxtəlif vəzifələrdə çalışıb. 2006-cı ildən Mədəniyyət və Turizm Nazirliyinin İşlər şöbəsində aparıcı məsləhətçi işləyir.

Fərrux Məsimovun təəssüratı belədir: «Mən bütün zəhmətkeş insanları alqışlayıram. Çünki həyatda zəhmətkeş insanın əməyi gec-tez qiymətləndirilir. Bizim rəhbərlikdən çox razıyam və hər kəsə minnətdarlığımı bildirirəm».

Rübabə Ənnağıyeva

(«Tərəqqi» medalı ilə təltif olunub)

Bakıda anadan olub. 1986-cı ildə Azərbaycan Dövlət Universitetinin tarix fakültəsini bitirib. Rus və fransız dillərini bilir. 1978-ci ildən Mədəniyyət Nazirliyində çalışmağa başlayıb. 28 il bu qurumda müxtəlif vəzifələrdə işləyib, 2006-cı ildən isə Mədəniyyət və Turizm Nazirliyində ümumi şöbədə baş məsləhətçidir.

Rübabə Ənnağıyeva: «Mənim üçün gözlənilməz hadisə oldu. Əməyimizə verilən bu yüksək qiymətə görə ölkə rəhbərliyinə, hörmətli nazirə dərin təşəkkürümü bildirirəm. Bu təltif bizi daha da əzmlə, səylə işləməyə ruhlandırır”.

Tahirə Əliyeva

(“Dövlət qulluğunda fərqlənməyə görə” medalı ilə təltif olunub)

Bakıda anadan olub. 1979-cu ildə Azərbaycan Dövlət İncəsənət İnstitutunu bitirib. 1979-1982-ci illərdə Lənkəran şəhər Mədəniyyət Evində bədii rəhbər, 1982-1983-cü illərdə isə Respublika Elmi Metodiki Mərkəzdə metodist işləyib. 1983-cü ildən 2006-cı ilə qədər Mədəniyyət Nazirliyində müxtəlif vəzifələrdə çalışıb. 2006-cı ildən Mədəniyyət və Turizm Nazirliyində işləyir. Hazırda nazirlikdə baş məsləhətçi-kollegiyanın məsul katibidir.

Fəxri ad alması Tahirə Əliyeva üçün də gözlənilməz olub: “1983-cü ildən Mədəniyyət Nazirliyi sistemində çalışıram. Həyatımda ilk yaddaqalan və sevindirici hadisə Lənkəran şəhərində çalışdığım zaman ümummilli liderimiz Heydər Əliyevlə görüşüm olub. İkinci önəmli hadisə isə cənab prezident İlham Əliyevin sərəncamı ilə əməyimin qiymətləndirilməsi oldu. Bu, mənim üçün həqiqətən də gözlənilməz oldu. Gözlənilməz hadisələr isə həmişə şirin olur. Cənab prezidentə və nazir başda olmaqla nazirliyin rəhbərliyinə minnətdarlığımı bildirirəm”.

Sevda Məlikova

(“Əməkdar mədəniyyət işçisi” fəxri adına layiq görülüb)

Bakıda anadan olub. 1983-cü ildə N.A.Rimski-Korsakov adına Dövlət Konservatoriyasının musiqişünaslıq ixtisasını bitirib. 1976-1978-ci illərdə Səməd Vurğun adına Mərkəzi Mədəniyyət evində musiqi nəzəriyyəsi müəllimi işləyib. 1983-1989-cu illərdə Azərbaycan Dövlət Filarmoniyasında baş redaktor vəzifəsində işləyib. 1989-cu ildən 2006-cı ilə qədər Mədəniyyət Nazirliyində müxtəlif vəzifələrdə çalışan S.Məlikova 2006-cı ildən Mədəniyyət və Turizm Nazirliyində İncəsənət şöbəsinin musiqi sektorunda işləyir. Hazırda həmin şöbədə Musiqi sektorunun müdiridir.

Sevda Məlikova bu təltifin onun üçün böyük sürpriz olduğunu dedi: «Hələ də çox həyəcanlıyam. Mənim üçün gözlənilməz oldu. Çoxillik iş fəaliyyətimi layiqli qiymətləndirdiyinə görə cənab prezidentə və hörmətli nazirə təşəkkürümü bildirirəm».

Gülnarə İbrahimova

(“Dövlət qulluğunda fərqlənməyə görə” medalı ilə təltif olunub)

Bakı şəhərində dünyaya göz açıb. 1988-ci ildə Azərbaycan Dövlət İncəsənət İnstitutunu klub işinin təşkilatçı-metodisti ixtisası üzrə bitirib. Əmək fəaliyyətinə 1979-cu ildən 1 nömrəli Musiqi Məktəbində fortepiano müəllimi kimi başlayıb. Sonralar Xarici Dillər İnstitutunda müəllimə, Musiqi Tədrisi üzrə Tədris-Metodika Kabinetində laborant, Mədəniyyət Nazirliyində katibə-stenoqrafçı işləyib. 1985-1990-cı illərdə Musiqi Tədrisi üzrə Tədris-Metodika Kabinetində metodist işləyib. 1990-cı ildən 2006-cı ilə qədər Mədəniyyət Nazirliyində çalışıb. 2006-cı ildən Mədəniyyət və Turizm Nazirliyinin Kadrlar şöbəsində böyük məsləhətçi işləyir.

Gülnarə İbrahimova gözəl bir kollektivdə çalışdığını və bundan qürur duyduğunu bildirdi: «Bu yaxınlarda Mədəniyyət və Turizm Nazirliyinin yaranmasının 5 illiyi tamam oldu. Bu, nazirlik üçün çox önəmli hadisə idi. Əmək fəaliyyətimizə nəzər salarkən isə görürük ki, artıq uzun illərdir bu sistemdə çalışırıq. Bu gün çox gözəl bir kollektivdə işləyirik. Mənim üçün çox fərəhlidir ki, orden, medal və fəxri adlara layiq görülən həmkarlarım arasında mənim də adım var. Bunu çox yüksək dəyərləndirirəm və ölkə başçımıza, nazirliyin rəhbərliyinə minnətdarlığımı bildirirəm».

Hazırladı: Fəxriyyə Abdullayeva

Mədəniyyət.- 2011.- 11 fevral.- S. 8.