Mədəni irsimiz təbliğ olunur

Fevralın 9-da Badamdar qəsəbəsindəki N.Nərimanov adına Kütləvi kitabxanada “Miras” Mədəni İrsin Öyrənilməsinə Kömək İctimai Birliyinin təşkilatçılığı ilə “Azərbaycanda son orta əsr şəhər mədəniyyəti və orta əsr Ağsu şəhəri” adlı seminar keçirildi. Seminarda 91, 236, 239 və 162 saylı məktəblərin müəllim və şagird kollektivi, kitabxananın fəal oxucuları iştirak edirdi.

Tədbiri giriş sözü ilə açan kitabxananın direktoru Arzu Soltan tədbir haqqında məlumat verdi, belə tədbirlərin şagirdlərin Azərbaycan tarixi ilə bağlı bilik və dünyagörüşünün artırılmasına səbəb olduğunu vurğuladı. Seminarda AMEA Arxeologiya və Etnoqrafiya İnstitutunun Numizmatika şöbəsinin müdiri Akif Quliyev “Orta əsr Ağsu şəhərində aparılan arxeoloji qazıntılar və nəticələr” mövzusunda məruzə ilə çıxış etdi. O, orta əsr Ağsu şəhərində aparılan qazıntılardan, aşkar olunan maddi-mədəniyyət nümunələrindən, həyata keçirilməkdə olan arxeoloji layihələrin əhəmiyyətindən danışdı. Seminarda “Miras” Mədəni İrsin Öyrənilməsinə Kömək İctimai Birliyinin “Yeni istedadlar” uşaq və gənclər mərkəzinin rəhbəri Cəfər Mənsiminin “Miras İctimai Birliyi və mədəni irsimiz” mövzusunda məruzəsi dinlənildi.

Seminarda qədim şəhərin qalıqlarını əks etdirən videogörüntülər, “Orta əsr Ağsu şəhərinin 3D görüntülü video-filmi” nümayiş olundu, mövzuya dair diskussiya aparıldı. Fərqlənən şagirdlərə “Ağsu şəhəri orta əsrlərdə” kitabı təqdim edildi.

Qeyd edək ki, ilk belə seminar ötən ay M.Qorki adına Mərkəzi Səyyar Kitabxana Fondunda gerçəkləşib. Azərbaycanın qədim tarixinin və zəngin mədəni irsinin elmi ictimaiyyətə və intellektual dairələrə çatdırılması, ictimaiyyətin Azərbaycan tarixi ilə bağlı biliklərinin və dünyagörüşlərinin hərtərəfli inkişafına dəstək olmaq, onların mədəniyyət ocaqlarına maraqlarının artırılması və onların gözü ilə bu sahədəki problemləri müəyyən etmək məqsədi güdən seminarlar muzey və kitabxanalarda, ali və orta məktəblərdə davamlı olaraq təşkil olunacaq.

Ceyhun

Mədəniyyət.- 2011.- 11 fevral.- S. 6.