“Azərbaycan-Ermənistan münasibətlərinin tarixi”

Kitab ermənilərin azərbaycanlılara qarşı həyata keçirdiyi soyqırımı və işğalçılıq müharibəsindən bəhs edir

Fevralın 15-də Beynəlxaq Mətbuat Mərkəzində “Əfqanıstan Veteranları İctimai Birliyi”nin təşkilatçılığı ilə sovet qoşunlarının Əfqanıstandan çıxarılmasının 22-ci ildönümünə və üç dildə - Azərbaycan, rus və ingilis dillərində nəşr olunmuş “Azərbaycan-Ermənistan münasibətlərinin tarixi” kitabının təqdimatına həsr olunmuş tədbir keçirildi. Qeyd edək ki, 15 fevral keçmiş sovet ölkələrində Əfqanıstan müharibəsində həlak olanların anım günü kimi qeyd olunur. 1980-1989-cu illərdə Sovet İttifaqının Əfqanıstanda apardığı bu müharibədə yüzlərlə azərbaycanlı da həlak olub.

Tədbiri giriş sözü ilə açan Əfqanıstan Veteranları İctimai Birliyinin sədri Məhəmməd Vəliyev sovet ordusu sıralarında Əfqanıstanda döyüşən, əlil və şəhid azərbaycanlı əsgərlərdən danışdı. Qeyd olundu ki, Əfqanıstan müharibəsindən keçmiş Azərbaycan oğulları vətənə qayıtdıqdan sonra doğma torpaqların müdafiəsi uğrunda erməni işğalçı qüvvələri ilə döyüşlərdə də böyük şücaət göstəriblər. O, “Azərbaycan Ermənistan münasibətlərinin tarixi” kitabından danışaraq nəşrin əhəmiyyətini vurğuladı. Qeyd edək ki, kitabın müəllifi tarix elmləri namizədi, BDU-nun müəllimi Boran Əzizdir.

Qarabağ Veteranları və Şəhid Ailələri Cəmiyyətinin sədri Mehdi Mehdiyev, Çernobl Əlilləri Cəmiyyətinin sədri Mirhəsən Həsənov, Azərbaycan Vətən Müharibəsi Veteranları Birliyinin sədri Füzuli Rzaquliyev və başqa çıxış edənlər kitabın bir sıra mühüm tarixi məqamlara işıq tutduğunu qeyd etdilər.

Savalan Fərəcov

Mədəniyyət.- 2011.- 16 fevral.- S. 14.