Uğurlu sənət yolunda

Bir vaxtlar təkcə respublikamızda deyil, onun sərhədlərindən kənarda da şöhrət tapan “Qarabağ bülbülləri” ansamblı bu gün doğma torpaqlardan, Ağdamdan uzaqda fəaliyyət göstərir. Bununla belə ansambl sıralarına qatılan yeni-yeni istedadlarla yaşayır, çevrəsi ilbəil genişlənir. Ansamblda Qarabağın müxtəlif bölgələrindən yeniyetmə ifaçılar fəaliyyət göstərir.

Ansamblın bədii rəhbəri Murad Rzayev də bizimlə söhbətində bu məqamı vurğuladı:

- Ansambl üzvlərinin sayı ilbəil, aybaay artır. Bizə təkcə Ağdamdan, Şuşadan deyil, Qarabağın digər bölgələrindən - Laçından, Cəbrayıldan, Füzulidən onlarca istedadlı gənc müraciət edir. İndi respublikamızda xüsusilə gənclər arasında muğama böyük maraq var. Bunun bir mühüm səbəbi də Heydər Əliyev Fondunun təşəbbüsü ilə keçirilən respublika muğam müsabiqələri, yeniyetmə, gənc ifaçıların bu müsabiqələrdə həvəslə iştirak etməsidir.

- Yeniyetmə musiqiçilərin ifa bacarıqları necə, sizi qane edirmi? Ansambla üzvlərin qəbulu üçün seçimi necə aparırsınız?

- Ansambla üzv qəbul etdiyimiz gənclərin hamısı bacarıqlı, işlərinə məsuliyyətlidir. Məşqlərə davamiyyətləri də qənaətbəxşdir. Onlardan biri, Laçın rayonundan Təbriz Həsənzadəni xüsusi qeyd etmək istərdim. O, üçüncü ildir ki, bizim kollektivdə çalışır. Musiqi duyumu, qavrayışı çox yaxşıdır.

(Murad müəllimlə söhbətimiz yekunlaşandan sonra Təbriz Həsənzadə ilə görüşdük):

- Təbriz, necə oldu ki, səndə sənətə, musiqiyə, muğama maraq yarandı?

- Əslimiz Laçın rayonunun Kamallı kəndindəndir. Ailəmizdə musiqiçi yoxdur. Ancaq əmimin yaxşı səsi-avazı, həm də musiqi təhsili var. Laçın rayonunun Musiqi Məktəbində xanəndə sinfində dərs deyir. Hələ məktəbə getməmişdən əvvəl avazla mahnılar oxuyardım, səsim vardı. Bunu valideynlərim də hiss etmişdi. Fikirləşmirdim ki, musiqiçi olaram. Ancaq respublikada keçirilən muğam müsabiqələrini izləyəndən sonra məndə də bu sənətə maraq yarandı. Valideynlərim də fikrimi bəyəndi. 2007-ci ildə sənədlərimi Yasamal rayonundakı Niyazi adına 22 saylı Uşaq Musiqi Məktəbinə verdim. Muğam sinfinin rəhbəri Kəvakib Şirinov məni qəbul etdi, musiqi duyumumu yoxladı, səsimə qulaq asdı və bəyəndi. İndi həmin məktəbin IV sinfində oxuyuram.

- Bəs “Qarabağ bülbülləri” ansamblına nə vaxt gəlmisən?

- Musiqi məktəbinə daxil olandan sonra ailəmizdə bu barədə söhbətlər olurdu. Bizim rayondan bu ansamblda Həmidə Əhmədova adlı bir qız var. Bir gün evdə qərara gəldik ki, mən də “Qarabağ bülbülləri” ansamblına müraciət edim. Elə də etdik. Ansamblın bədii rəhbəri Murad Rzayevlə görüşdük. O da məni dinlədi, səs duyumumu bəyəndi, razılığını bildirdi. Artıq üçüncü ildir ki, bu ansamblda çalışıram.

- Sənətin sirlərinə necə, yiyələnə bilirsənmi?

- Daha çox xalq və bəstəkar mahnılarına üstünlük verirəm: “Apardı sellər Saranı”, “Qarabağ şıkəstəsi”, “Ağdam”, “Yaşa, ürəyim, yaşa”, muğamlardan “Mirzə Hüseyn Segahı” , “Zabul Segah”, “Heyratı”, “Qatar”ı öyrənə bilmişəm. Ansambla üzv olandan müxtəlif tədbirlərdə və bayram şənliklərində iştirak edirəm. “Dünya Azərbaycanlılarının Həmrəylik günü” münasibətilə Ağdam rayonunda, “N” saylı hərbi hissənin əsgərləri qarşısında konsert verdik. Sonra Quzanlı qəsəbəsinə gəldik. Qəsəbə sakinləri qarşısında da geniş proqramla çıxış etdik. Həmin gün respublika rəhbərliyi də orada idi. Hörmətli prezidentimiz İlham Əliyev də bizi dinlədi. Həm də xatirə şəkli çəkdirdik. Bu görüş kollektivimizin hər bir üzvündə böyük təəssürat yaratdı...

Savalan Fərəcov

Mədəniyyət.- 2011.- 18 fevral.- S. 15.