ABŞ Konqresində Xocalı soyqırımı qurbanları anılıb

1992-ci ilin fevralında Azərbaycanda erməni silahlı qüvvələri tərəfindən həyata keçirilən amansız Xocalı soyqırımının 19-cu ildönümü ABŞ Konqresinin Nümayəndələr Palatasında anılıb. Azərbaycanla bağlı işçi qrupunun həmsədri konqresmen Bill Şuster, eləcə də Konqres üzvləri xanım Virciniya Foks, Stiv Koen və xanım Eddi Bernis Conson Nümayəndələr Palatasında verdikləri bəyanatlarla həmkarlarını Azərbaycanın Xocalı şəhərinin acı taleyinə biganə qalmamağa və sovet ordu hissələrinin köməyi ilə erməni silahlı qüvvələri tərəfindən yerlə-yeksan edilən şəhərin sakinlərinin xatirəsini anmağa çağırıblar.

Şimali Karolina ştatının Konqresdəki nümayəndəsi xanım Virciniya Foks deyib: “Mən, həmkarlarımı mənə qoşularaq Xocalı şəhəri və həmin fəlakətli günlərdə qətlə yetirilən Xocalı sakinlərini yad etməyə və bu faciənin ildönümündə Azərbaycana dərin başsağlığı verməyə çağırıram”.

Tennesi ştatının konqresmeni Stiv Koen isə Xocalı faciəsini həmkarlarına təsvir edərkən o zaman hadisə haqda yazan ABŞ-ın “Newsweek”və “Times” jurnallarından məqalələri xatırladıb. Texas ştatının təmsilçisi xanım Eddi Bernis Conson vurğulayıb ki, Xocalıda qətlə yetirilən insanların xatirəsi qarşısında hamı bu cür addımları qətiyyətlə pisləməyə borcludur.

Konqresdə Azərbaycanla bağlı işçi qrupunun həmsədri, Pensilvaniyalı qanunverici Bill Şuster Xocalı qırğınını bəşəriyyətə qarşı cinayət adlandıraraq hadisənin ildönümünü anan Azərbaycan xalqı ilə birlikdə olmağa çağırıb.

Mədəniyyət.- 2011.- 23 fevral.- S. 15.