TÜRKSOY-un “Əhməd Zəki Validi Toğan ili”nə yekun vurulub

Məlum olduğu kimi, TÜRKSOY 2010-cu ilİ məşhur başqırd alimi, türkoloq Əhməd Zəki Validi Toğanın xatirəsinə həsr etmişdi. “Əhməd Zəki Validi Toğan ili” çərçivəsində TÜRKSOY ölkələrində silsilə tədbirlər həyata keçirilib. Bu tədbirlərə Başqırdıstanın paytaxtı Ufada keçirilən mərasimlə yekun vurulib.

Azərbaycan Mədəniyyət və Turizm Nazirliyinin TÜRKSOY-dakı təmsilçisi Elçin Qafarlının qəzetimizə verdiyi məlumata görə, ”Əhməd Zəki Validi Toğan ili”nin bağlanış tədbirlərində iştirak etmək üçün TÜRKSOY-un bas katibi Düsen Kaseinovun başçılığı altında nümayəndə heyəti fevralın 14-16-da Başqırdıstanda səfərdə olub. TÜRKSOY-un baş katibinin müavini Fırat Purtaş, Qazaxıstan təmsilçisi Askar Turqanbayev, Azərbaycan təmsilçisi Elçin Qafarlı, Türkiyə mədəniyyət və turizm nazirinin müavini Kamal Fahir Gənc və başqalarının yer aldığı heyət Başqırdıstan hökuməti tərəfindən yüksək səviyyədə qəbul edilib. Heyət Əhməd Zəki Validi Toğanın vətəni olan İşimbay şəhərində, onun doğulduğu kənddə olub, ev muzeyini, adına olan məktəbi və Qafuri rayonunu ziyarət edib. Ufa şəhərində yubiley ilinin bağlanış mərasimində D.Kaseinova, E.Qafarlıya, A.Turqanbayevə, K.F.Gəncə və digər fəxri qonaqlara Başqırdıstan Elmlər Akademiyası Rəyasət Heyətinin təsis etdiyi “Əhməd Zəki Validi Toğanın xatirəsinin əbədiləşdirilməsində xüsusi xidmətlərinə görə” medalı təqdim olunub.

M.Sultanova

Mədəniyyət.- 2011.- 23 fevral.- S. 3.