“Xocalı fəryadı”

Xalça muzeyində yaradıcılıq sərgisi

Fevralın 24-də Lətif Kərimov adına Azərbaycan Xalçası və Xalq Tətbiqi Sənəti Dövlət Muzeyində “Humay” Milli mükafatçısı, Rəssamlar İttifaqının üzvü Rauf Əbdülhüseyn oğlunun və onun davamçısı, Əbdülhüseyn Rauf oğlunun Xocalı soyqırımına həsr olunmuş “Xocalı fəryadı” adlı yaradıcılıq sərgisi keçirildi.

Tədbirdə çıxış edən muzeyin direktoru Röya Tağıyeva bildirdi ki, 1992-ci ilin 26 fevralında törədilmiş Xocalı soyqırımı təkcə Azərbaycan xalqına qarşı deyil, bütövlükdə bəşəriyyətə və insanlığa qarşı bir cinayətdir: “Hər bir sənət adamı tarixin müəyyən məqamlarını öz əsərlərində yaşatmağa çalışır. Keçəçilik sənətində yüksək peşəkarlıq qabiliyyətinə malik olan Rauf Əbdülhüseyn oğlu və onun davamçısı da bu mövzuya müraciət edərək gözəl sənət nümunələri yaradıblar”.

Mədəniyyət və Turizm Nazirliyinin Təsviri və dekorativ sənət sektorunun aparıcı məsləhətçisi Qalib Qasımov qədim keçəçilik sənətini yaşadan sərgi müəlliflərinin yaradıcılığından danışdı. Nümayiş etdirilən əsərlərdə həm xalqımızın qəhrəmanlıq salnaməsinin, həm də ağrılı-acılı faciələrinin əks olunduğunu qeyd etdi: “Biz bu əsərlərdə Xocalı faciəsinə bir sənətkarın gözü ilə baxırıq. Bilirik ki, xalqımız hər zaman faciələrə böyük iradə və əzmkarlıqla sinə gərib, tariximizi yaşadıblar. Sənət adamları da bu istiqamətdə həmişə öz sözlərini deməyə çalışırlar. Belə sərgilərlə, təsviri və dekorativ sənət əsərləri vasitəsilə tariximizi təbliğ edə bilərik”.

Rauf Əbdülhüseyn oğlu sərginin təşkilatçılarına minnətdarlığını ifadə etdi. Qeyd edək ki, sərgidə ata və oğulun 17 əsəri nümayiş olunur.

Ceyhun.

Mədəniyyət.- 2011.- 25 fevral.- S. 2.