Turistin yol xəritəsi
Turist gəldiyi yer
haqqında ölkəyə
daxil olan andan məlumat əldə etmək istəyir. Qrup şəklində gələn turistlər üçün bu məlumatı əldə
etmək o qədər
də çətin olmur. Çünki onları əvvəlcədən
danışılmış bələdçi qarşılayır,
hotelə yerləşdirir.
Qaldığı hoteldə isə
istədiyi zəruri məlumatı ala bilir.
Amma fərdi şəkildə
gələn turistlər
üçün ölkə
haqqında məlumat əldə etmək bir qədər çətindir. Bu zaman onun köməyinə
turist xəritəsi gələ bilər.
Turist xəritəsi nədir və ondan hansı
məlumatları əldə
etmək olar?
Turist xəritələri vaxtaşırı yenilənməlidir
Azərbaycan Həmkarlar İttifaqları
Konfederasiyası Turizm
və Ekskursiyalar Şurası sədrinin müavini Sabir Rəhimovun dediyinə görə, turist xəritəsi ölkənin
tarixi və mədəni abidələrini,
eyni zamanda turizm obyektlərini əks etdirməlidir: “Bu xəritədən turist bir növ yol
göstəricisi kimi istifadə edə bilər. Orada hər bir məlumat qısa, konkret və aydın qeyd olunmalıdır”.
Mütəxəssis
bildirir ki, turist xəritəsi müvafiq dövlətin nəzarəti altında çap olunmalı və orada hansı
bina, obyekt və s. əks olunması müvafiq dövlət qurumu, o cümlədən Mədəniyyət
və Turizm Nazirliyi tərəfindən
müəyyənləşməlidir: “Turist xəritəsi aeroportda müxtəlif yerlərdə, o cümlədən
Bakı Turizm İnformasiya Mərkəzinin
buradakı filiallarında
turistlərə təqdim
edilməlidir. Vaxtaşırı olaraq bu xəritə
yenilənməli, yeni
istifadəyə verilən
turizm obyektləri, marşrutlar buraya daxil edilməlidir».
Bakı Turizm İnformasiya
Mərkəzinin direktor
müavini Bəxtiyar Qılıncovun sözlərinə
görə, təmsil
etdiyi qurum tərəfindən Bakıya
aid turist xəritəsi
buraxılıb. Burada
əsasən Bakı şəhərini 3 marşrut
üzrə gəzmək
üçün istiqamətlər
göstərilib: «Regionlar
hələlik bu xəritəyə daxil deyil. Biz Mədəniyyət
və Turizm Nazirliyi ilə belə xəritələrin
hazırlanmasında birgə
işləyə bilərik.
Bu xəritələrin turizm işində əhəmiyyəti böyükdür.
Hər bir turist ölkəyə gələndə harada dincəlmək, turizm xidmətlərinin təklif
olunması və s. barədə məlumat almaq istəyir. Eyni zamanda nəzərə almaq lazımdır ki, turizm inkişafda
olan sahədir, infrastruktur dəyişir, yeni istirahət mərkəzləri, turizm
marşrutları yaranır.
Bu baxımdan ölkənin turist xəritəsinə də
vaxtaşırı olaraq
dəyişikliklər etmək
lazım gəlir».
V.Qılıncov
bildirdi ki, bir müddət əvvəl BTİM-in layihələrindən
biri kimi «Bakı şəhərinin
qonaq kartı» nəşr edilib: «Bakı Turizm İnformasiya Mərkəzi
ilə müqaviləsi
olan mehmanxana və restoranlara həmin kartlar təqdim edilir. Bu razılaşmalara əsasən,
şəhərimizə gələn
qonaq «Bakı şəhərinin qonaq kartı»nı əldə edərək mehmanxana və restoranlar, avtomobil icarəsi şirkətləri
və s. xidmətindən
güzəştlə istifadə
edə bilər. Bu kartla bağlı
məlumatlar BTİM-in saytında
yer alıb. Onu da qeyd edim
ki, Bakı MDB ölkələri arasında
Minskdən sonra bu kartı buraxan
ikinci şəhərdir».
B.Qılıncov bildirdi ki,
BTİM tərəfindən hazırda «Turist marşrutları» adlı çap materialı hazırlanır. Bu nəşr Azərbaycanda mövcud olan turist marşrutlarını
əhatə edəcək.
Yaxın
aylarda həmin nəşrin işıq üzü görəcəyi
nəzərdə tutulur.
“Eurovision” müsabiqəsi öncəsi Bakının
yeni turist atlası hazırlanır
Mədəniyyət
və Turizm Nazirliyi Turizm şöbəsinin müdir
müavini - Daxili turizmin inkişafı sektorunun müdiri Mahir Qəhrəmanov bildirdi ki, hələ
bir neçə il əvvəl Dövlət Torpaq və Xəritəçəkmə
Komitəsi tərəfindən
Azərbaycanın turist
xəritəsi hazırlanıb.
Xəritəni Mədəniyyət və Turizm Nazirliyi müxtəlif tədbirlərdə, sərgilərdə
təqdim edir, iştirakçılara paylayır.
Xəritədə Azərbaycanda fəaliyyət
göstərən mehmanxana
və mehmanxana tipli obyektlər, onlara necə getmək, hansı marşrutdan istifadə etmək barədə məlumatlar öz əksini tapıb.
Qeyd edək ki, ötən
il Bakı
Kartoqrafiya Fabriki tərəfindən Bakının
turist xəritəsi də hazırlanıb. Xəritədə 2010-cu ilə
qədər olan bütün məlumatlar əks olunub, əlavə bilgilər, məsələn, İçərişəhərin
bütün memarlıq
abidələri barədə
qısa məlumat, İçərişəhərin planı və s. yer alıb.
Gələn il Azərbaycanda
keçiriləcək 57-ci “Eurovision” mahnı müsabiqəsinə
tamaşa etməyə
gələcək qonaqlar
üçün isə
paytaxtın yeni atlası da hazırlanır. Dövlət Torpaq və
Xəritəçəkmə Komitəsindən bildiriblər
ki, belə bir atlasın hazırlanmasında məqsəd
müsabiqəni izləməyə
gələn xarici vətəndaşların Bakıda
sərbəst hərəkət
etmələrinə şərait
yaratmaqdır. Atlasda Bakı
şəhərinin bütün
əraziləri haqda geniş məlumat veriləcək. Paytaxtdakı mədəni-tarixi abidələr,
görməli ərazilər,
parklar və digər yerlər dəqiqliklə göstəriləcək.
Fəxriyyə Abdullayeva
Mədəniyyət.-
2011.- 13 iyul.- S. 9.