Qəbələdə
möhtəşəm musiqi bayramı
III
Beynəlxalq musiqi festivalı çərçivəsində
pianoçuların II Beynəlxalq müsabiqəsi uğurla
davam edir
Xəbər verdiyimiz kimi, Heydər
Əliyev Fondunun təşkilatçılığı ilə
Qəbələdə III Beynəlxalq musiqi festivalı
keçirilir. Festival çərçivəsində iyulun
15-də pianoçuların II Beynəlxalq müsabiqəsinə
start verilib.
“Qafqaz Resorte” hotelində
keçirilən müsabiqəyə dünyanın bir
çox ölkələrindən (Çin, Ukrayna,
Gürcüstan, Türkiyə, Yaponiya və s.) gənc
pianoçular qatılıb. Mədəniyyət və Turizm
Nazirliyinin İncəsənət şöbəsinin müdiri
Fərəh Əliyeva Qəbələ festivalı çərçivəsində
pianoçuların ilk müsabiqəsinin 2009-cu ildə
keçirildiyini bildirdi: “Festival hər il, müsabiqə isə
iki ildən bir keçirilir. Budəfəki müsabiqədə
nüfuzlu və tanınmış musiqiçilər
iştirak edir”.
Qeyd edək ki, 3 turdan ibarət olan
müsabiqədə iştirakçılar dünya və
Avropa bəstəkarlarının əsərlərini ifa edirlər.
Finala vəsiqə qazanmış qaliblər Ü.Hacıbəyli
adına Azərbaycan Dövlət Simfonik Orkestri ilə birgə
çıxış edəcək. Müsabiqə qaliblərinə
1, 2, 3-cü yerlər üzrə mükafatlar təqdim
olunacaq. Müsabiqənin şərtlərinə görə,
hər bir ifaçı mütləq bir Azərbaycan əsəri
ifa etməlidir. Bu il Tofiq Quliyevin “Qaytağı” əsəri
ifa olunacaq. Bu əsərin ən yaxşı ifasına görə
xüsusi mükafat təqdim ediləcək.
İyulun 22-də yekunlaşacaq
müsabiqədən sonra Qəbələ III Beynəlxalq
musiqi festivalının konsert proqramları başlayacaq.
Festival isə 2 hissədən ibarətdir. İyulun 23-dən
30-dək Ü.Hacıbəyli adına Azərbaycan Dövlət
Simfonik Orkestri həm yerli, həm də əcnəbi
ifaçılarla çıxışlar edəcək.
İyulun 30-da festivalın rəsmi açılışı
olacaq. İyulun 30-dan avqustun 5-dək konsert proqramları isə
məşhur musiqiçi Yuri Başmetin rəhbərlik etdiyi
“Yeni Rusiya” Dövlət Simfonik Orkestri tərəfindən təqdim
olunacaq. Fərəh Əliyeva onu da qeyd etdi ki, III Beynəlxalq
musiqi festivalı çərçivəsində “Yay
akademiyası” təşkil olunub və burada ustad dərsləri
keçiriləcək. Festival çərçivəsində
Ağdaş və Şəkidə keçiriləcək iki
səyyar konsert də nəzərdə tutulub.
Bakı Musiqi Akademiyasının
rektoru, professor Fərhad Bədəlbəyli müsabiqəyə
güclü ifaçıların
qatıldığını söylədi: “Qəbələdə
növbəti dəfə belə bir musiqi bayramının təşkilinə
görə Heydər Əliyev Fonduna minnətdaram. Qəbələ
III Beynəlxalq musiqi festivalı Azərbaycan mədəniyyətini
dünyaya təqdim etmək üçün ən
yaxşı fürsətdir. Bu, mədəniyyətimizin
inkişafı üçün yaradılmış yüksək
şəraitin daha bir təzahürüdür. Bu həm də
Azərbaycanın, Azərbaycan musiqisinin təbliğatıdır.
Qəbələ festivalı xarici qonaqlara Azərbaycan bəstəkarlarının
əsərlərini təqdim etməklə yanaşı, yerli
musiqisevərlərə dünyanın klassik sənət inciləri
ilə yaxından tanış olmağa imkan yaradır.
Müsabiqəyə gəlincə, qeyd etmək istərdim ki,
rəqabət güclü olacaq”.
Münsiflər heyətinin sədri,
amerikalı pianoçu, BMT yanında Beynəlxalq İncəsənət
Akademiyasının fəxri akademiki, ABŞ-dakı Culiard
Musiqi Akademiyasının professoru Oksana Yablonskaya müsabiqənin
ədalətli aparılacağını vurğuladı: “Belə
möhtəşəm musiqi bayramının keçirilməsinə
görə münsiflər heyətinin üzvləri,
müsabiqədə iştirak edən 9 ölkənin 15
iştirakçısı adından Heydər Əliyev Fondunun
prezidenti, UNESCO-nun və İSESCO-nun xoşməramlı səfiri,
Milli Məclisin deputatı Mehriban xanım Əliyevaya minnətdarlıq
edirik. Mən Azərbaycanın Qara Qarayev, Fikrət Əmirov
kimi bəstəkarlarının əsərlərinə
yaxşı bələdəm. Mən azərbaycanlılarla təhsil
almışam, həmçinin çoxlu azərbaycanlı tələbələrim
olub. Onların ifasını dinləmişəm.
İştirakçıların bəzilərini
tanıyıram. Yüksək səviyyəli müsabiqə
olacaq”.
Münsiflərdən
gürcüstanlı Manana Doijaşvili də Azərbaycanın
dilbər guşəsində keçirilən musiqi
bayramını xoş hisslərlə qiymətləndirdi:
“İlk dəfədir burdayam. Təbiət, yaradılan şərait
festival və müsabiqə keçirmək üçün
çox gözəl məkandır. Ümid edirəm ki,
müsabiqənin səviyyəsi də yüksək olacaq.
Bütün iştirakçılara uğurlar diləyirəm.
Bu festivala isə uzunömürlü olmağı
arzulayıram. Onun dünyada məşhur festivala çevrilməsini
istərdim”.
***
İyulun 15-16-da müsabiqənin
ilk turu keçirilib. Birinci turda 9 ölkədən 15 pianoçu
- Andrey Yaroşinski (Rusiya), Yelena Smirnova (ABŞ), Van Lin
(Çin), Abdiel Yarquez (Meksika), Nərgiz Kəngərli (Azərbaycan),
Mizuho Nakada (Yaponiya), Toğrul Adiloğlu (Azərbaycan-Türkiyə),
Eren Yahsı, Eren Aydoğan (Türkiyə), Fatimə Əliyeva
(Rusiya-Azərbaycan), Ketevan Cakarataşvili, Aleksandr Vaşadze,
Anna Kipiani, Daniel Kontuaşvili (Gürcüstan) və Aleksandr
Samoilov (Ukrayna) bacarıqlarını nümayiş etdiriblər.
Müsabiqə
iştirakçılarının hər biri ümumilikdə
20 dəqiqə olmaqla 3 əsər ifa edib. Gənc pianoçular
dünya şöhrətli bəstəkarlardan İ.S.Baxın
“Prelüd və Fuqa” əsərini, V.M.Motsart və
Y.Haydnın “Sonata”sını, F.Şopenin “Virtuoz
etüdü”nü səsləndiriblər.
İfalardan sonra amerikalı
pianoçu, ABŞ-dakı Culiard Musiqi Akademiyasının
professoru Oksana Yablonskayanın rəhbərliyi ilə
münsiflər heyətinin qərarı açıqlanıb.
İlk turda 15 nəfərdən 4-ü müsabiqəni tərk
edib. Azərbaycanlı pianoçular Nərgiz Kəngərli və
Fatimə Əliyeva da ikinci turda iştirak hüququ qazanan 11 gənc
pianoçu sırasında yer alıblar.
***
İyulun 17-18-də müsabiqənin
ikinci turu keçirilib. Bu turda 7 ölkədən 11
pianoçu - Andrey Yaroşinski (Rusiya), Abdiel Yarquez (Meksika), Nərgiz
Kəngərli (Azərbaycan), Mizuho Nakada (Yaponiya), Fatimə Əliyeva
(Rusiya-Azərbaycan), Daniel Kontuaşvili, Ketevan Cakarataşvili,
Aleksandr Vaşadze, Anna Kipiani (Gürcüstan), Aleksandr Samoilov
(Ukrayna) və Eren Aydoğan (Türkiyə) müsabiqənin
finalına çıxmaq uğrunda mübarizə
aparıblar.
Proqrama əsasən, bu mərhələdə
gənc pianoçuların hər biri ümumilikdə 50 dəqiqə
ərzində 4 əsər ifa edib. Pianoçular dünya
şöhrətli bəstəkarlardan L.V.Bethovenin
sonatasını, F.Listin etüdünü, Tofiq Quliyevin
“Qaytağı” əsərini, eləcə də öz
seçimləri ilə İ.Brams, R.Şuman və ya
S.Raxmaninovun bir romantik əsərini ifa ediblər.
Finalçılar məlum oldu
İyulun 18-də müsabiqənin
ikinci turu başa çatdıqdan sonra finala vəsiqə
qazanmış ifaçıların adları elan olunub.
Professor Oksana Yablonskayanın rəhbərlik etdiyi 11 nəfərdən
ibarət münsiflər heyətinin
açıqladığı yekun qərara əsasən, Andrey
Yaroşinski (Rusiya), Nərgiz Kəngərli (Azərbaycan),
Mizuho Nakada (Yaponiya), Ketevan Cakarataşvili, Aleksandr Vaşadze,
Anna Kipiani (Gürcüstan), Aleksandr Samoilov (Ukrayna) bu turda
uğurla çıxış edərək finalda iştirak
etmək hüququ qazanıblar.
Daniel Kontuaşvili
(Gürcüstan), Abdiel Yarquez (Meksika), Fatimə Əliyeva
(Rusiya-Azərbaycan) və Eren Aydoğan (Türkiyə)
müsabiqəni tərk etməli olublar.
Finala vəsiqə qazanmış 7
pianoçu iyulun 21-22-də Üzeyir Hacıbəyli adına
Azərbaycan Dövlət Simfonik Orkestri ilə birgə konsert
verəcək.
Reyhan İsayeva
Mədəniyyət.-
2011.- 20 iyul.- S. 9.