Azərbaycanla İspaniya arasında mədəni və turizm əməkdaşlığı müzakirə edilib

 

Mədəniyyət və turizm naziri ispaniyalı deputatlarla görüşüb

İyulun 27-də mədəniyyət və turizm naziri Əbülfəs Qarayev ölkəmizdə səfərdə olan İspaniya Krallığı Konqresinin nümayəndə heyətini qəbul edib.

Konqresin Xarici Əlaqələr komitəsinin sədri Xose Antonio Duran Yeidanın başçılıq etdiyi heyətə millət vəkilləri Xuan Moskoso, Fransek Rikoma və Xosu Erkoreka daxil idi. Görüşdə Azərbaycanla İspaniya arasında ikitərəfli əməkdaşlıqla bağlı müzakirə və fikir mübadiləsi aparılıb. Nazir Əbülfəs Qarayev ikitərəfli əlaqələrdən danışaraq mədəniyyət və turizm sahələrində qarşılıqlı təmasların artırılmasının və əməkdaşlığın böyük potensialından geniş istifadə olunmasının zəruriliyini vurğulayıb. Qeyd olunub ki, hər il İspaniyanın Madrid şəhərində keçirilən Fitur beynəlxalq turizm sərgilərində Azərbaycan tərəfi mütəmadi olaraq iştirak edir. Nazir Azərbaycanda İspaniya Krallığının səfirliyinin açılmasının qarşılıqlı turist mübadiləsinin artmasına müsbət təsir göstərəcəyini qeyd edib.

Əbülfəs Qarayev həmçinin Azərbaycanda tikilən yeni mehmanxanalar, Şahdağ Qış-Yay Turizm Kompleksi və digər turizm infrastruktur obyektləri haqda qonaqlara məlumat verib. Nazir Azərbaycanın Eurovision mahnı müsabiqəsindəki parlaq qələbəsindən sonra ölkəmizə böyük turist axınının gələcəyinin gözlənildiyini də nəzərə çatdırıb.

Nazir turizm sahəsi üzrə əməkdaşlığı daha da genişləndirmək məqsədilə İspaniyada fəaliyyət göstərən turizm şirkətlərini hər il aprel ayında Bakıda keçirilən Azərbaycan Beynəlxalq turizm və səyahət sərgisində iştirak etməyə dəvət edib. Eyni zamanda, nazir İspaniyanın əyalətləri ilə əməkdaşlıq etmək və infoturların keçirilməsi təklifini də irəli sürüb. Əbülfəs Qarayev iki ölkə arasında turizm və mədəniyyət sahəsində əməkdaşlığın gələcəkdə də genişlənəcəyinə əmin olduğunu bildirib.

 

Mədəniyyət.- 2011.- 29 iyul.- S. 3.