Xalça sənətimiz Vaşinqtonda təqdim edilib

ABŞ Toxuculuq Muzeyinin ənənəvi festivalında ilk dəfə olaraq Azərbaycan xalçalarından bəhs edən guşə təqdim edilib. “Toxuculuğun təntənəsi” adlı festivalda Vaşinqtonda fəaliyyət göstərən Qarabağ Fondunun təşəbbüsü ilə milli xalçaçılıq məktəblərimiz, bu sənət növünün Azərbaycan mədəniyyətində tutduğu yer və s. barədə məlumatları əks etdirən guşə təşkil edilib. Azərbaycan xalçaları guşəsi festival iştirakçılarının böyük marağına səbəb olub. Amerika Muğam Cəmiyyətinin təsisçisi Cefri Verbok Azərbaycan guşəsinin bələdçisi kimi qonaqların suallarını cavablandırıb.

Festivalın qonaqları Azərbaycan muğamları və milli rəqslərimizdən nümunələrlə də tanış olublar. Amerikada yaşayan kamança ustası İmamyar Həsənov muğam parçaları, Vaşinqtonda təhsil alan azərbaycanlı tələbələr və “Qardələn” türk rəqs ansamblı isə konsert proqramı ilə çıxış ediblər.

ABŞ-ın Qarabağ Fondunun direktoru Diana Altman Azərbaycan xalçalarının Amerikada tanıdılması istiqamətində silsilə tədbirlərin həyata keçirildiyini bildirib. O, Fondun Azərbaycan xalçaları mövzusunda internet səhifəsi hazırlayacağını deyib.

Mədəniyyət.- 2011.- 15 iyun.- S. 8.