Kitabxanaçılarımızın Belarusda təcrübə mübadiləsi

 

   Azərbaycan Respublikası Mədəniyyət və Turizm Nazirliyi, Respublika Mədəniyyət Müəssisələri İşçilərinin Hazırlıq və İxtisasartırma Mərkəzi, Belarus Dövlət Mədəniyyət və İncəsənət Universiteti arasında imzalanmış müqaviləyə əsasən Azərbaycan nümayəndə heyəti ixtisasartırma və təcrübə mübadiləsi məqsədilə iyunun 14-18-də Belarusun paytaxtı Minskdə səfərdə olub.

   Nümayəndə heyətinə Respublika Mədəniyyət Müəssisələri İşçilərinin Hazırlıq və İxtisasartırma Mərkəzinin direktoru Ramazan Şabanov, Respublika Mədəniyyət Müəssisələri İşçilərinin Hazırlıq və İxtisasartırma Mərkəzinin aparıcı mühəndis-proqramçısı Tural Qədirov, C.Cabbarlı adına Respublika Gənclər Kitabxanasının Kitabxana-biblioqrafiya proseslərinin avtomatlaşdırılması şöbəsinin müdiri Yeganə Sadıqlı, Binəqədi rayon MKS-nin direktoru Rəna Biləndərli, Qusar rayon MKS-nin direktoru Zahir Mustafayev daxil idi.

   Nümayəndə heyəti "Kitabxana işinin müasir metod və metodikaları" mövzusunda keçirilmiş dəyirmi masa və diskussiyalarda iştirak edib. Azərbaycan kitabxana mütəxəssisləri Belarus Respublikası Milli Kitabxanası və bir sıra kitabxanalarının fəaliyyəti ilə tanış olub və təcrübə mübadiləsi aparıblar. Görüşlər zamanı «Azərbaycan Respublikasında kitabxana-informasiya sahəsinin 2008-2013-cü illərdə inkişafı üzrə Dövlət Proqramı»nın icrası, Azərbaycanda kitabxana-informasiya sahəsində aparılan islahatlar barədə belaruslu mütəxəssislərə məlumat verilib.

 

 

   Mədəniyyət.- 2011.- 22 iyun.- S. 3.