Amerikanın "Melvin Ulyams" qrupu Kürdəmirdə konsert verib

Kürdəmir rayon MKS - nin binasında 2005-ci ilin aprel ayında yaradılan Regional Kitabxana Məlumat Mərkəzi hazırda Amerika Mərkəzi adı altında fəaliyyət göstərir.

Qeyd edək ki, Amerika Mərkəzi bu müddət ərzində ABŞ-ın Azərbaycandakı səfirliyi tərəfindən maliyyələşdirilib və bütün rayon əhalisinə pulsuz xidmət göstərir. Rayonun hər bir vətəndaşı bu mərkəzin həm kompyuterlərindən, həm də internet şəbəkəsindən istədiyi qədər pulsuz istifadə edə bilir.

Fəaliyyət göstərdiyi gündən pulsuz ingilis dili kurslarının keçirilməsi Amerika Mərkəzinin təqdirəlayiq işlərindəndir. Mərkəzin koordinatoru Azər Orucov, ABŞ-dan Azərbaycana gəlmiş könüllülər Tot və Sara Frenslər ingilis dili dərslərinin tədrisi və gənclərlə iş aparmaq sahəsində xeyli işlər görürlər.

Dil tədrisiylə yanaşı, Amerika Mərkəzi gənclərin asudə vaxtlarından səmərəli istifadə etmələrinin təşkili üçün də xeyli işlər görür. Mərkəzdə gənclərin iştirakı ilə müxtəlif tədbirlər və Amerika bayramları keçirilir. "Melvin Ulyams" qrupunun Kürdəmirə gəlişi və burada rəngarəng konsert proqramı ilə cıxışı buna bariz nümunədir.

ABŞ-ın Missisipi ştatının "Melvin Ulyams" qrupunun rayonumuzda konsert verməsi Kürdəmir rayon ictimaiyyəti tərəfindən xüsusi diqqət və maraqla qarşılandı. Okeanın o tayından ölkəmizə təşrif buyuran "Melvin Ulyams" GRAMMY mükafatının 6 qat nominantıdır. 4 nəfərdən ibarət olan bu qrup 1 saatlıq konsert zamanı böyük tamaşaçı auditoriyasını öz ətrafına sıx toplaya bildi. Konsert o qədər yüksək səviyyədə keçdi ki, tamaşaçıların alqışları qrupu təkrar-təkrar ifa etməyə dəvət edirdi. "Melvin Ulyams" qrupu rayon sakinləri ilə birgə mahnı da ifa etdilər və bu da onlar tərəfindən böyük alqışlarla qarşılandı.

Bu konsert bir daha sübut etdi ki, doğrudan da musiqi sərhəd tanımır. Janrından, alətindən asılı olmayaraq hər bir dövlətin musiqisi özünəməxsusdur, gözəldir, dəyərli və maraqlıdır. Musiqi həm də dövlətlər arasında ən gözəl, anlaşıqlı ünsiyyət əlaqəsidir. Belə ki, dilini anlamasan da, hər bir dövlətin musiqisinin ritmini tutub, ondan zövq almaq, onu sevmək olur.

Konsert böyük ruh yüksəkliyi ilə başa çatdı. Konsertdə rayon ictimaiyyətinin bir çox nümayəndələri iştirak etdilər. Konsertdən sonra, “Melvin Ulyams" qrupunun iştirakçıları tərcüməçilər vasitəsi ilə rayon əhalisi ilə söhbət etdilər, onlarla şəkil çəkdirdilər.

Məryəm Əliyeva,

Kürdəmir rayon MKS-nin

metodika-biblioqrafiya şöbəsinin

baş kitabxanaçısı

Mədəniyyət.- 2011.- 24 iyun.- S. 4.