Kulinarlarımız beynəlxalq festivaldan 9 medalla qayıdıb

Azərbaycan Milli Kulinariya Mərkəzi Türkiyədə keçirilən beynəlxalq kulinariya çempionatında 9 medal qazanıb. Naxçıvan Kulinariya Mərkəzinin direktoru Səyyarə Sadıxovanın verdiyi məlumata görə, çempionatda Azərbaycanı «Naxçıvan» və «Qarabağ» komandaları təmsil ediblər. Azərbaycanlı kulinarların bacarıqları və milli yeməklər münsiflər heyəti tərəfindən yüksək qiymətləndirilib. Milli komandamız çempionatda 5 gümüş, 4 bürünc medalla yanaşı, 6 sertifikat da əldə edib. Festivalda Azərbaycan nümayəndə heyəti Naxçıvan və Qarabağ bölgələrinə xas milli etnik mətbəximizi nümayiş etdiriblər. Yarışda 22 ölkənin kulinarları öz ölkələrinin mətbəxini təqdim ediblər. Qeyd edək ki, «Naxçıvan» Kulinariya Mərkəzi 2010-cu ildə, «Qarabağ» Kulinariya Mərkəzi isə bu ilin əvvəlində yaradılıb.

Mədəniyyət.- 2011.- 2 mart.- S. 4.