Berlin Filarmoniyasında xatirə konserti

Berlin Filarmoniyasında Xocalı faciəsinin 19-cu ildönümünə həsr olunmuş xatirə konserti keçirilib.

Azərbaycanın Almaniyadakı səfirliyinin təşkil etdiyi xatirə konsertində bu ölkədə fəaliyyət göstərən diplomatik korpusun rəhbərləri, jurnalistlər, elmi dairələrin nümayəndələri, Almaniyada təhsil alan azərbaycanlı tələbələr, diasporumuzun təmsilçiləri iştirak ediblər. Konsert barədə məlumatın Berlin Filarmoniyasının rəsmi saytında yerləşdirilməsi tədbirə marağı daha da artırıb. 600-dən çox qonağın yer aldığı konsertdə öncə Xocalı soyqırımı və “Xocalıya ədalət” beynəlxalq kampaniyası barədə məlumat verilib.

Sonra Almaniyanın tanınmış “Berlin Classic Players” kamera orkestri görkəmli Avstriya və alman bəstəkarları Motsart və Haydnın, eləcə də Azərbaycan bəstəkarlarının klassik musiqilərini yüksək məharətlə ifa edib. Həmyerlimiz, Köln Konservatoriyasının müəllimi, pianoçu Elnarə İsmayılova tədbir iştirakçılarını Azərbaycan bəstəkarları Qara Qarayev, Fikrət Əmirov, Cövdət Hacıyevin musiqiləri ilə tanış edib.

Mədəniyyət.- 2011.- 2 mart.- S. 12.