Azərbaycan mədəniyyətlərarası dialoqun ən fəal iştirakçısıdır

Azərbaycan hökumətinin təşəbbüsü ilə Bakıda keçiriləcək Dünya Mədəniyyətlərarası Dialoq Forumu son illər Mədəniyyətlər İttifaqı təşəbbüsünün İspaniya ilə həmsədri olan Türkiyədə də böyük maraq doğurub.

Bu barədə UNESSO-nun Türkiyə Milli Komissiyasının Mədəniyyətlər İttifaqı Komitəsinin sədri, professor Məhmət Kalpakçı bildirib. O vurğulayıb ki, mədəniyyətlərarası dialoqda fəal iştirak edən və Avropa Şurası ilə UNESCO arasında mədəniyyətlər ittifaqı haqqında sazişə hökumət səviyyəsində imza atmış, bütün dünyada müasir, dini tolerantlığı yüksək səviyyədə olan ölkə kimi tanınan Azərbaycanda bu cür mötəbər tədbirin keçirilməsi təsadüfi deyil.

Məhmət Kalpakçının sözlərinə görə, UNESCO, BMT-nin Sivilizasiyalar Alyansı, İSESCO və Avropa Şurasının ən yüksək səviyyədə qatılacağı bu forumda UNESCO-nun Türkiyə Milli Komissiyasının Mədəniyyətlər İttifaqı Komitəsi də konkret layihələr təqdim edə bilər: “Mədəniyyətlər və dinlərarası dialoq konkret layihələrlə dəstəklənməlidir. Türkiyənin Qafqaz və Balkanda mədəniyyət turizminin inkişafı, xüsusilə ortaq qədim musiqi alətlərinə dair Azərbaycan ilə birgə xüsusi tanıtma proqramı hazırlanıb. Qədim “İpək yolu”nun bərpası da sivilizasiyalararası dialoqun mühüm bir hissəsidir”.

Avropa və Asiya sivilizasiyalarının qovuşduğu mühüm şəhər olan Bakıda bu cür vacib tədbirin keçirilməsini əlamətdar hadisə adlandıran M.Kalpakçı belə təşəbbüslərin dini radikalizmin qarşısının alınması, din, vicdan və ifadə azadlığının təmin olunması sahələrində beynəlxalq əməkdaşlığa töhfə verəcəyini vurğulayıb. Bakı forumu BMT-nin Sivilizasiyalar Alyansı və Avropa Şurasının keçən il Lissabonda keçirdikləri forumun davamı olacaq.

Mədəniyyət.- 2011.- 4 mart.- S. 2.