Xanımların əl işlərinin sərgisi keçirildi

Sərgiyə gələnlər «Xına gecəsi»ndə iştirak ediblər

Beynəlxalq Qadınlar Günü və Novruz bayramı münasibətilə martın 3-də Azərbaycan Dillər Universitetinin İnformasiya Resurs Kompleksində əl işləri sərgisi açıldı. Tədbirdə ilk sözdə kompleksin direktoru Şəhla Xudiyeva çıxış edərək, layihənin məqsədini açıqladı: «Sərginin keçirilməsində məqsəd milli dəyərlərin saxlanılması və qorunması, istedadlı insanları tapıb tanıtmaqdır”.

Universitetin rektoru Səməd Seyidov isə xanımların əl işlərindən danışdı: «Bizim xanımların əlləri qızıldır. Bu il artıq 8 Mart bayramının 100 illiyidir. Bayram qocalır, amma xanımlar heç vaxt qocalmır».

Çıxışlardan sonra isə sərgiyə baxış keçirildi. Sərgidə müxtəlif yaş qruplarını əhatə edən xanımların biçmə, toxuma-tikmə, rəsm, karikatura, dizayner Xanım Məmmədovanın Azərbaycanın müxtəlif regionlarının özünəməxsusluğunu nəzərə alaraq hazırladığı milli geyimlər, xalçaçılıq sənətini nümayiş etdirən əsərlər, yağlı boya ilə çəkilmiş rəsm əsərləri, milli üslubla bəzədilmiş gəlinciklər, pannolar, təbii güllərdən hazırlanan kompozisiyalar, muncuq və qiyməli daş-qaşlarla hazırlanmış qadın bəzək əşyaları məmulatlarından ibarət 500-dən yuxarı əl işi nümayiş olundu. Sərgi iştirakçılarına ilk dəfə olaraq yalnız kağız məmulatlarından hazırlanan əl işləri də təqdim olundu. Daha sonra isə səpgiyə gələnlər universitetin Regionşünaslıq kafedrasının təşkilatçılığı ilə tələbələr tərəfindən hazırlanan «Xına gecəsi» adlı kompozisiyanı izlədilər.

Xatırladaq ki, əl işləri sərgisi son iki ildə sayda 4-cü dəfədir ki, keçirilir. İlk belə sərgi 2009-cu ilin martında reallaşıb.

Gülər

Mədəniyyət.- 2011.- 4 mart.- S. 2.