“Aşıq Şəmşir, Dəlidağdan keçəndə...”

Martın 9-da Səməd Vurğunun ev-muzeyində Xalq şairinin sənət dostu olmuş aşıq Şəmşirə həsr edilmiş “Aşıq Şəmşir, Dəlidağdan keçəndə...” xatirə məclisi keçirilib. Ev-muzeyinin direktoru, S.Vurğunun nəvəsi Aygün Vəkilova bu məclisin baharda keçirilməsinin təsadüf olmadığını bildirib: “Səməd Vurğun baharı çox sevirdi”.

AMEA Nizami adına Ədəbiyyat İnstitutu direktorunun müavini Məhərrəm Qasımlı hər iki sənətkarın Azərbaycan ədəbiyyatında müstəsna mövqeyindən danışıb, onların yaradıcılıqlarının gələcək nəsillərə çatdırılmasının vacibliyini qeyd edib.

Filologiya elmləri üzrə fəlsəfə doktoru Aslan Salmansoy, şair İlyas Tapdıq Səməd Vurğunun Aşıq Şəmşirlə görüşünü xatırlayıb və bu görüşün elə o andaca əbədiləşdiyini söyləyiblər. Aşığın oğlu Qəmbər Şəmşiroğlu dillər əzbəri olmuş bu görüşdən maraqlı xatirələr danışıb.

Əməkdar mədəniyyət işçisi, aşıq Ədalət Dəlidağlı və aşıq Mehdi Məsimov Səməd Vurğunla aşıq Şəmşirin deyişməsini oxuyublar. 126 nömrəli məktəbin şagirdləri böyük şairin şeirlərindən nümunələr söyləyiblər.

Tədbirdə həmçinin Q.Şəmşiroğlunun “Təknur“ nəşriyyatında çapdan çıxmış “Tale oxşarlığı” kitabı təqdim edilib. Müəllif atasının irsinə göstərdiyi diqqət və qayğya görə S.Vurğun fondunun direktoru Aygün Vəkilovaya Aşıq Şəmşir Mədəniyyət Ocağı İctimai Birliyinin adından “Təşəkkürnamə” təqdim edib.

Mədəniyyət.- 2011.- 11 mart.- S. 6.