Böyük türkmən şairi Nurməhəmməd Əndəlibin kitabı təqdim olundu

Martın 9-da M.F.Axundov adına Milli Kitabxanada böyük türkmən şairi və mütəfəkkiri, ümumtürk ədəbiyyatının görkəmli nümayəndəsi Nurməhəmməd Əndəlibin “Şeirlər, poemalar, dastanlar” kitabının təqdimat mərasimi keçirildi.

Mədəniyyət və Turizm Nazirliyi, Türkmənistanın Azərbaycandakı səfirliyi və Azərbaycan Milli Kitabxanasının birgə təşkil etdiyi tədbiri kitabxananın direktoru Kərim Tahirov açaraq Nurməhəmməd Əndəlibin yaradıcılığından bəhs etdi.

Sonra mədəniyyət və turizm nazirinin birinci müavini Vaqif Əliyev çıxış edərək Nurməhəmməd Əndəlibin türkmən və ümumtürk ədəbiyyatında xüsusi yeri olduğunu vurğuladı.

Türkmənistanın Azərbaycandakı səfiri Toylı Komekov öz çıxışında azərbaycanlı türkoloq Ramiz Əskər tərəfindən artıq sayca üçüncü türkmən şairinin əsərlərinin Azərbaycan dilinə tərcümə olunduğunu nəzərə çatdırdı.

Azərbaycan Yazıçılar Birliyinin sədri Anar, BDU-nun professoru Qara Namazov və başqaları öz çıxışlarında Nurməhəmməd Əndəlib yaradıcılığından danışdılar.

Kitabın tərtibçisi, BDU-nun filologiya fakültəsinin türkoloji araşdırmalar elmi-tədqiqat laboratoriyasının baş elmi işçisi, filologiya elmləri doktoru Ramiz Əskər Nurməhəmməd Əndəlibin türkmən ədəbiyyatının banisi olduğunu qeyd etdi.

Tədbirdə Türkiyə, Rusiya, Qazaxıstan, Özbəkistan, Tacikistan, Belarus, Kuba və başqa ölkələrin Azərbaycandakı səfirləri iştirak edirdilər.

Tədbir iştirakçıları Əndəlibin həyat və yaradıcılığına həsr olunmuş kitab və dövrü mətbuat materiallarını əhatə edən sərgi ilə tanış oldular.

Kitabda bu il anadan olmasının 350 illiyi tamam olan böyük türkmən şairi, ümumtürk ədəbiyyatının görkəmli nümayəndəsi Nurməhəmməd Əndəlibin seçilmiş əsərləri toplanıb. Kitab 31 mart - 4 aprel 2009-cu il tarixlərində İstanbulda TÜRKSOY tərəfindən təşkil olunan “Türk ləhcələri arasında uyğunlaşdırma çalışmalarının bugünkü durumu və qarşıya çıxan problemlər” mövzusunda beynəlxalq simpoziumun tövsiyələrinə və yekun bəyannaməsinə uyğun olaraq nəşr edilib.

Yeganə

Mədəniyyət.- 2011.- 11 mart.- S. 4.