«Akademik Milli Dram Teatrının foto-salnaməsi» təqdim olundu

Martın 9-da Akademik Milli Dram Teatrında iki kitabdan ibarət «Akademik Milli Dram Teatrının fotosalnaməsi»nin təqdimat mərasimi keçirildi. Mərasimdə çıxış edən teatrın direktoru İsrafil İsrafilov fotosalnamənin teatr fədakarlarına həsr olunduğunu bildirdi. Qeyd olundu ki, Mədəniyyət və Turizm Nazirliyi və Milli Dram Teatrı tərəfindən hazırlanan fotosalnamədə Azərbaycan teatrının yarandığı gündən bu günə kimi olan dövrdə teatrın tarixinə dair sənədlər, dövrü mətbuatdan götürülmüş informasiyalar və nadir fotolar toplanıb. Salnamənin hazırlanmasında görkəmli tədqiqatçı Qulam Məmmədlinin, professor İlham Rəhimlinin kitablarından, uzun müddət teatrda truppa müdiri işləmiş Əməkdar mədəniyyət işçisi Qürbət Qurbanovun gündəliklərindən istifadə edilib.

Kitabın redaktoru Atababa İsmayıloğlu Azərbaycan teatrının salnaməsinin nəşrlərinin gələcəkdə də davam edəcəyini dedi. Buraxılışa məsul, Əməkdar mədəniyyət işçisi Maqbet Bünyadov teatrın aparıcı qüvvəsi olan aktyorların fəaliyyətindən danışdı.

Qeyd edək ki, kitabın hər cildinə görkəmli sənətkarların oynadığı tamaşalardan audio-disklər əlavə olunub.

Nəşrin layihə rəhbəri və ön söz müəllifi mədəniyyət və turizm naziri Əbülfəs Qarayev, koordinatoru nazir müavini Ədalət Vəliyevdir. Salnaməni sənətşünaslıq namizədi Məmmədşah Atayev tərtib edib.

Gülər

Mədəniyyət.- 2011.- 11 mart.- S. 3.