Balaca boyları var...

Dram dərnəyi gələcəyin aktyorlarını yetişdirir

Bu balaca aktyorların məharətini görəndə, Azərbaycanda bu sənətin bundan sonra da inkişaf edəcəyinə əmin olursan. Uşaq və yeniyetmələrə teatrın, aktyorluq sənətinin ilk sirlərini öyrədən dərnəklərin əslində necə böyük iş gördüyünü yəqin edirsən.

Onlardan biri də Nizami rayon Uşaq Gənclər Yaradıcılıq Mərkəzinin dram dərnəyidir. Dərnəyin üzvlərini ilk dəfə Cəfər Cabbarlının şeirlərinə hazırlanmış səhnəciyi təqdim etdikləri zaman görəndə, sözün əsl mənasında təəccüb etdik. Boyları balaca, yaşları az, amma böyük aktyorluq məharəti... Hiss olunurdu ki, uşaqlar istedadlıdırlar, gördükləri işə də böyük həvəslə yanaşırlar. Amma bu qabiliyyəti inkişaf etdirmək, onlara stimul vermək lazımdır.

Dram dərnəyində balaca aktyorları ilə Xanım İsmayılova məşğul olur. Özü də incəsənət adamıdır. İncəsənət Universitetinin dram və kino aktyorluğu fakültəsini bitirib. İnstitut illərindən başlayaraq Musiqili Komediya Teatrında, Akademik Milli Dram Teatrında işləyib. Sonralar pedaqoji fəaliyyətə başlayaraq, əvvəlcə Səbail rayonu 20 nömrəli Uşaq Yaradıcılıq Mərkəzində, sonra Nizami rayon Uşaq Gənclər Yaradıcılıq Mərkəzində dram dərnəyinin rəhbəri işləməyə başlayıb.

Onun rəhbərlik etdiyi dram dərnəyində klassik yazıçılardan müasir dramaturqlaradək müxtəlif əsərlər səhnələşdirilir. Mirzə Fətəli Axundovun 5 komediyası səhnəyə qoyulub: “Dərnək üzvlərinin hər biri Axundovun yaradıcılığını, obrazları, xarakterləri mənimsəyiblər. Dərnək üzvləri tamaşalardan parçalar hazırlayır, yazıçı-şairlərin poeziyalarından nümunələrlə şəhər və rayon miqyaslı tədbirlərdə çıxış edirlər. Yaradıcılıq Mərkəzində işlərin sahmana salınması üçün isə ildə 2 dəfə açıq dərslər olur və bu dərslərdə dərnək üzvləri hesabat verirlər”.

Dərnəkdə 3 qrup var. Hər qrupda 10-15 uşaq fəaliyyət göstərir. Dərnək üzvləri həftədə 3 dəfə görüşür, məşqlər edib, kompozisiyalar hazırlayır. X.İsmayılovanın sözlərinə görə, uşaqlar arasında rəqabət də var: “Onlar əsasən baş rollara can atır, qəhrəman obrazı oynamaq istəyirlər. Hər dərs ilinin əvvəlində ərizə ilə dərnəyə qəbul aparılır. Lazım olanda məktəbə gedib, elan verir və uşaqlar arasında seçim aparırlar. İncəsənətə meyli olanlar bu mərkəzə cəlb olunurlar. Mərkəzdə dərslər təsdiq olunmuş proqram üzrə aparılır. Dərnəyə müxtəlif tədbirlərdən dəvətlər gəlir, bu dəvətlər əsasında kompozisiyalar hazırlayırlar. Balaca aktyorlar tədbirlərdə çıxış etməyə çox həvəslidirlər və məmnuniyyətlə buna hazırlaşırlar.

Dərnək balaca aktyorların sayəsində yetərincə nailiyyətlər qazanıb: “Son nailiyyətlərindən biri Hüseyn Cavidin yubileyi münasibətilə keçirilən şəhər üzrə müsabiqəni qeyd edə bilərəm. Bu müsabiqədə dərnəyin aktyorları ifaları ilə 2 birinci, 1 ikinci və 1 üçüncü yerlə layiq görülüblər. Azərbaycan folklor nümunələrinə aid «Azərbaycan folklorunu yaşadaq»adlı müsabiqəni də misal çəkə bilərik. Dərnək üzvləri həmin müsabiqədə bədii qiraət nominasiyasında «Koroğlu» kompozisiyası ilə birinci yeri tutublar. Dərnəyin ən fəal üzvləri isə Rüfanə Allahverdiyeva, Rəna Məmmədova, Cəfərov Orxan, Bağırzadə Zeynalabdin, Yasəmən Bağırzadə, Namazov Nadir, Məhərrəmov İmran və Arzu Tağıyevadır.

Dərnək rəhbərinin sözlərinə görə, uşaqlar hazırladıqları kompozisiyalarla müntəzəm olaraq çıxışlar etməyə həvəslidirlər: “İstəyirəm ki, dərnək üzvlərimizi daha geniş auditoriya tanısın. Televiziyada muğam və estrada ilə bağlı müsabiqələr keçirilir. Yaxşı olardı ki, dram dərnəkləri, uşaqların teatr qabiliyyəti ilə bağlı da belə müsabiqələr olsun. Bu uşaqlarda stimul da olardı. Çünki belə layihələr uşaqların tanınmalarına və üzə çıxmalarına şərait yaradır. Bu balacalar arasında gələcəyin aktyorları var. Onları üzə çıxarmaq lazımdır. Mərkəzdə uşaqların yaradıcılıqlarının inkişafı, düzgün istiqamətlənməsi üçün şərait yaradılıb. Əlbəttə, daha geniş şərait yaradılsa, iş də ortaya çıxır. İstedadlı uşaq istedaddır. Amma bu istedad açılmalıdır».

Gülər Nizamiqızı

Mədəniyyət.- 2011.- 18 mart.- S. 11.