Avstriyada azərbaycanlı döyüşçülərə abidə ucaldılıb

Mayın 7-də Avstriyanın Yuxarı Avstriya federal əyalətinin Ebenzee qəsəbəsində II Dünya müharibəsi zamanı burada yerləşmiş əsir düşərgəsinin azad olunması münasibətilə anma mərasimi keçirilib. Burada azərbaycanlı əsirlərin xatirəsini əbədiləşdirmək üçün abidə qoyulub. Azərbaycanın Avstriyadakı səfirliyinin təşəbbüsü və dəstəyi ilə yaradılmış xatirə lövhəsinin açılışında mədəniyyət və turizm nazirinin birinci müavini Vaqif Əliyevin rəhbərliyi ilə səfirliyin əməkdaşları və bu ölkədəki Azərbaycan icmasının təmsilçilərindən ibarət nümayəndə heyəti iştirak edib.

Abidənin açılış mərasimində çıxış edən V.Əliyev Azərbaycanın II Dünya müharibəsində həm insan resursları, həm də təbii sərvətləri ilə faşizm üzərində qələbənin əldə olunmasına böyük töhfələr verdiyini vurğulayıb. O, Ebenzee qəsəbəsinin rəhbərliyinə bu torpaqlarda həlak olmuş soydaşlarımızın xatirəsinin əbədiləşdirilməsinə göstərilən dəstəyə görə Azərbaycan hökuməti adından təşəkkür edib.

Ebenzee qəsəbəsinin meri Hervart Loydl abidənin ucaldılmasına görə Azərbaycan tərəfinə minnətdarlığını bildirib, xatirə kompleksinin gələcək nəsillər üçün bir yadigar və eyni zamanda xəbərdarlıq olduğunu qeyd edib.

Xatırladaq ki, Mauthauzen əsir düşərgəsinin filialı olan Ebenzee 1943-cü ildə yaradılıb və 1945-ci ildə ABŞ ordusu tərəfindən azad edilənədək burada 27 mindən artıq hərbi əsir yerləşdirilib. Onlardan 8 min nəfəri məruz qaldığı işgəncələr nəticəsində həlak olub. Azərbaycan səfirliyinin araşdırmaları nəticəsində hərbi əsirlər arasında 18 nəfər soydaşımızın olduğu müəyyənləşib.

İndiyədək həmin əsir düşərgəsində keçmiş SSRİ ölkələri arasında yalnız Rusiya və Ukraynanın analoji xatirə lövhələri mövcud olub.

Xatırladaq ki, 2001-ci ildə Mauthauzendə həlak olmuş soydaşlarımızın xatirəsini əbədiləşdirən xatirə lövhəsi açılmışdı. Rəsmi məlumata görə, müharibə illərində bu düşərgədə 81 nəfər azərbaycanlı əsir qətlə yetirilib.

Mədəniyyət.- 2011.- 11 may.- S. 4.