“Sabir mollanəsrəddinçi satirik şeirin banisidir”

Cəlil Məmmədquluzadənin ev-muzeyində ədəbi məclis

Cəlil Məmmədquluzadənin ev-muzeyi respublika muzeylərində keçiriləcək 14 may - “Muzeylər gecəsi” aksiyasında “M.Ə.Sabir mollanəsrəddinçi satirik şeirin banisidir” mövzusunda ədəbi məclislə iştirak edəcək.

Cəlil Məmmədquluzadənin ev-muzeyindən bildiriblər ki, gecənin görkəmli satirik şair Mirzə Ələkbər Sabirə həsr olunması hər il ənənəvi olaraq may ayında “M.Ə.Sabir poeziyası günləri”nin keçirilməsi ilə bağlıdır. “Açıq qapı” günü ilə başlayacaq tədbir gecə saatlarınadək davam edəcək.

Gün ərzində muzeyi ziyarət edənlərə ekspozisiya üzrə pulsuz ekskursiya xidməti göstəriləcək. M.Ə.Sabirin həyat və yaradıcılığı haqqında çıxışlar dinləniləcək.

Muzeyin foyesində ziyarətçilər “M.Ə.Sabir - Azərbaycanın böyük satira ustası” mövzusunda səyyar sərgi ilə tanış olacaq və həmin mövzuda mühazirə dinləyəcəklər. Tədbirdə “Səbirli adəmin fəryadı” sənədli televiziya filmindən kadrlar göstəriləcək.

Cəlil Məmmədquluzadənin ev-muzeyində yaradılmış “Gənc turistlər” klubunun üzvləri M.Ə.Sabirin şeirləri əsasında hazırladıqları bədii kompozisiya ilə çıxış edəcəklər.

Mədəniyyət.- 2011.- 13 may.- S. 14.