“Mən, nənəm, İliko və İllarion”

Mingəçevir Dövlət Dram Teatrında premyera

İşıqlar sönür, pərdə açılır. Səhnədə kənd həyatını xatırladan dekorasiya görünür. Bir azdan tamaşaçı səhnə əsərinin qəhrəmanlarının adlarını eşidir: Zuriko, Olqa nənə, İliko, İllarion...

Bunlar M.Davudova adına Mingəçevir Dövlət Dram Teatrında səhnəyə qoyulan “Mən, nənəm, İliko və İllarion” tamaşasının qəhrəmanlarıdır. Görkəmli gürcü yazıçısı Nodar Dumbadzenin eyniadlı povesti əsəri əsasında hazırlanan tamaşaya mayın 10-da ictimai baxış keçirildi.

Artıq xeyli vaxt idi ki, Mədəniyyət və Turizm Nazirliyinin təşəbbüsü ilə Əməkdar incəsənət xadimi, rejissor Bəhram Osmanov, quruluşçu rəssam Sevinc Həsənova, baletmeyster Rasim Cəfərov bu əsəri səhnələşdirmək üçün Mingəçevir Dövlət Dram Teatrına ezam olunmuşdular. Gərgin məşqlər artıq arxada qalıb və rejissor Bəhram Osmanov, yaradıcı heyət səhnə əsərini Mingəçevir teatrsevərlərinin müzakirəsinə təqdim etməyə hazırdır.

Qeyd edək ki, üç il ərzində Mingəçevir teatrının binasında əsaslı təmir işləri getsə də, kollektiv bir gün də olsa öz fəaliyyətini ləngitməyib. “Energetiklər” Mədəniyyət evində müvəqqəti yerləşən teatrın yaradıcı heyəti çətinliklərə baxmayaraq, səhnə fəaliyyətini davam etdirib. Bu yaxınlarda Əli Əmirlinin “Onun iki qabırğası”, Robert Tomanın “Tələ” əsərlərini səhnələşdirən heyət doğma teatr binasının təmirindən sonrakı açılış mərasiminə ciddi hazırlaşır.

Prezident İlham Əliyevin sərəncamı ilə təsdiq edilmiş “Azərbaycan teatrı 2009-2019-cu illərdə“ Dövlət Proqramı, Azərbaycanda teatr sahəsində aparılan islahatlar, bütün ölkəmizdə olduğu kimi, Mingəçevirdə də mədəni həyata müsbət təsir edib.

Teatrın direktoru Əməkdar mədəniyyət işçisi Həsən Həsənov və teatrın baş rejissoru, Prezident mükafatçısı Günay Səttarova yeni layihələrlə tamaşaçıları sevindirməyə çalışırlar. Yalnız böyüklərin deyil, həm də uşaqların maraq dünyasını və mədəni estetik zövqünü formalaşdırmağa çalışan kollektiv Yeni il ərəfəsində “Ağıllı kuklalı, nağıllı, qışım mənim”, Novruz bayramında isə milli adət-ənənələri özündə yaşadan və müasirliklə sintez edilən “Novruz sərgüzəştləri” adlı bədii-əyləncəli tamaşalarla uşaqları sevindirib.

Mayın 10-da teatrda ictimai baxışı keçirilən “Mən, nənəm, İliko və İllarion” tamaşasında əməkdar artistlər Ella Yaqubova, Akif Mirabov, Şıxı Yaqubov və gənc aktyorlardan Asim Məmmədov, Fəridə Xankişiyeva, Pərvanə Davudova, Ceyhun Əhmədov və başqaları rol alıblar. Tamaşada rəqslərə Bakıdan teatra ezam olunmuş Rasim Cəfərov quruluş verib. İctimai baxışa ziyalılar, incəsənət nümayəndələri dəvət olunmuşdu. Tamaşaçı alqışı ilə qarşılanan səhnə əsərinin premyerası yaxın günlərdə olacaq.

Əslində hər bir teatrın uğuru ölçüyəgəlməz tamaşaçı alqışıdır. Elə isə biz də Mingəçevir teatrına bol-bol alqış və uğur arzulayaraq sənətsevərləri “Mən, nənəm, İliko və İllarion” tamaşasına baxmağa dəvət edirik.

Esmira Hacıyeva

Mədəniyyət.- 2011.- 18 may.- S. 7.