Vaqif İbrahim oğlu Həsənov

Azərbaycan mədəniyyətinə ağır itki üz vermişdir. Görkəmli rejissor, Əməkdar incəsənət xadimi, «Zirvə», «Qızıl Dərviş», «Humay» mükafatları laureatı, professor Vaqif İbrahim oğlu Həsənov uzun sürən ağır xəstəlikdən sonra 2011-ci il may ayının 12-də vəfat etmişdir.

Vaqif İbrahimoğlu 1949-cu il oktyabr ayının 18-də Bakının Mərdəkan qəsəbəsində anadan olmuşdur. 1967-ci ildə M.Əliyev adına Azərbaycan Dövlət Teatr İnstitutunun «Teatr və kino aktyorluğu» fakültəsinə daxil olmuş və 1972-ci ildə həmin təhsil ocağını bitirmişdir. 1973-1976-cı illərdə Azərbaycan Dövlət Gənc Tamaşaçılar Teatrında aktyor işləmiş, 1976-1979-cu illərdə Teatr Cəmiyyətinin nəzdində fəaliyyət göstərən Eksperimental teatr studiyasının, 1979-1982-ci illərdə isə Tədris teatrının bədii rəhbəri olmuşdur.

1982-1989-cu illərdə Ş.Qurbanov adına Azərbaycan Dövlət Musiqili Komediya Teatrının baş rejissoru işləyən Vaqif İbrahimoğlu bu teatrın səhnəsində bir sıra tamaşalara orijinal quruluşlar vermişdir.

Vaqif İbrahimoğlu Azərbaycan Dövlət Akademik Milli Dram Teatrında, Türkiyənin Ankara, Bursa şəhərlərinin teatrlarında, Estoniyanın «Uqala» teatrında tamaşalar qurmuş və Azərbaycan mədəniyyətini ləyaqətlə təmsil etmişdir.

1989-cu ildən ömrünün sonuna kimi özünün yaratdığı «Yuğ» teatrında bədii rəhbər işləmişdir. Bu teatrda onun quruluş verdiyi bir sıra tamaşalar - «Salam», «Oğul», «Açar», «Dad», «Səma», «Leyli demə», «Bir, iki, bizimki», «Ağrı», «Yol», «Gəl gedək», «Ümid», «Can üstə» və s. Azərbaycan mədəniyyət məkanında böyük hadisə kimi qarşılanmışdır.

Azərbaycan Dövlət Mədəniyyət və İncəsənət Universitetində uzun illər pedaqoji fəaliyyət göstərən Vaqif İbrahimoğlu yeni düşüncəli teatr kadrlarının yetişməsi üçün yorulmadan çalışmış, öz bilik və bacarığını gənc nəslə səxavətlə öyrətmişdir.

Teatr sənəti sahəsindəki xidmətlərinə görə Vaqif İbrahimoğlu «Əməkdar incəsənət xadimi» fəxri adına, Prezident təqaüdünə, Azərbaycan Respublikasının Mədəniyyət və Turizm Nazirliyinin «Zirvə» mükafatına, Teatr Xadimləri İttifaqının «Qızıl Dərviş» mükafatına, «Bakılı» Beynəlxalq Cəmiyyətinin «Humay» ictimai milli mükafatına layiq görülmüşdür.

Vaqif İbrahimoğlunun əziz xatirəsi teatr ictimaiyyətinin və teatrsevərlərin qəlbində əbədi yaşayacaq.

Allah rəhmət eləsin.

Azərbaycan Respublikası Mədəniyyət və Turizm Nazirliyi

Azərbaycan Teatr Xadimləri İttifaqı

Mədəniyyət.- 2011.- 18 may.- S. 7.