Vurğun Vəkilov “Citta di Pesaro” müsabiqəsinin qalibi olub

İstedadlı pianoçu, Bülbül adına Orta İxtisas Musiqi Məktəbinin VII sinif şagirdi, Prezident təqaüdçüsü, Xalq şairi Səməd Vurğunun nəticəsi Vurğun Vəkilov İtaliyanın Pesaro şəhərində keçirilmiş VIII “Citta di Pesaro” Beynəlxalq müsabiqəsinin qalibi olub.

İtaliya, Yaponiya, Rusiya, Bolqarıstan, Koreya Respublikası, Çin və digər ölkələrin gənc musiqiçilərinin qatıldıqları müsabiqədə Azərbaycanı təmsil edən V.Vəkilov “B” kateqoriyasında 12-16 yaşlı piano ifaçıları arasında fərqlənərək birinci yeri qazanıb. Azərbaycanlı musiqiçi müsabiqənin yekun konsertində Qara Qarayevin “Eskiz” əsərini də ifa edib.

Vurğun Vəkilov 1998-ci ildə anadan olub. 2004-cü ildən Bülbül adına Orta İxtisas Musiqi Məktəbində təhsil alır. 2008-ci ildə ulu öndər Heydər Əliyevin anadan olmasının 85 illik yubileyinə həsr edilmiş gənc ifaçıların I Respublika müsabiqəsinin qalibi olub. Bir çox yubiley və festivallarda qələbə qazanan V.Vəkilovun adı Azərbaycanın gənc istedadlarının “Qızıl kitabı”na yazılıb.

V.Vəkilov Bülbül adına Orta İxtisas Musiqi Məktəbində Elmira Mustafayeva və Bakı Musiqi Akademiyasının prorektoru Oqtay Abasquliyevdən ixtisas təhsili alır. Həmçinin Azərbaycan Bəstəkarlar İttifaqı nəzdində uşaq yaradıcılıq studiyasının şagirdi kimi Xalq artisti Firəngiz Əlizadə ona dərs deyir.

Mədəniyyət.- 2011.- 25 may.- S. 10.