Çində Azərbaycan Mədəniyyəti Günləri

Mədəniyyət və turizm naziri Əbülfəs Qarayev tədbirlərdə iştirak edir

Mayın 23-də Çin Xalq Respublikasında Azərbaycan Mədəniyyəti Günləri başlayıb. Tədbirlərdə mədəniyyət və turizm naziri Əbülfəs Qarayevin başçılığı ilə nümayəndə heyəti iştirak edir.

Nümayəndə heyətinin tərkibinə Azərbaycan Turizm İnstitutunun rektoru Cəfər Cəfərov, Teatr Xadimləri İttifaqının sədri Azər Paşa Nemət, parlament və icra hakimiyyətinin təmsilçiləri, incəsənət ustaları, məşhur solistlər, Azərbaycan Dövlət Rəqs Ansamblının rəqqasları, Azərbaycan Dövlət Kamera Orkestrinin musiqiçiləri daxildirlər. İki ölkə arasında mədəni sahədə əlaqələri möhkəmləndirmək, Azərbaycan mədəniyyətini Çində daha geniş tanıtmaq məqsədi daşıyan mədəniyyət günləri çərçivəsində Qara Qarayev adına Azərbaycan Dövlət Kamera Orkestrinin, Dövlət Rəqs Ansamblının solistlərinin və muğam ifaçılarının çıxışları, Azərbaycana həsr olunmuş fotosərginin, milli geyimlərimizdən və miniatür kitablardan ibarət sərgilərin təşkili nəzərdə tutulub.

Azərbaycan nümayəndə heyətinin ÇXR-in Mədəniyyət Nazirliyində, Çin Milli Turizm Administrasiyasında, Çin Milli Muzeyində görüşləri planlaşdırılır.

Azərbaycan ilə Çin arasında mədəni əlaqələrin böyük - qədim İpək Yolu dövrünə gedib çıxan tarixi var. Azərbaycan müstəqilliyini bərpa etdikdən sonra iki ölkə arasında mədəni əlaqələr də yeni müstəviyə qədəm qoyub, mədəniyyət sahəsində sənədlər imzalanıb. 2006-cı ilin dekabrında Azərbaycanın Çindəki səfirliyinin nəzdində “Şuşa” Mədəniyyət Mərkəzi fəaliyyətə başlayıb.

Mədəniyyət.- 2011.- 25 may.- S. 2.