Xalq Bank”ın mədəniyyətimizə yeni töhfəsi

 

  “Xalq əmanəti”nin növbəti nəşri təsviri sənətimizə həsr olunub

  

   “Xalq Bank”ın təşəbbüsü və maliyyə dəstəyi ilə həyata keçirilən “Xalq əmanəti” layihəsinin növbəti, sayca beşinci nəşrində Azərbaycanın görkəmli rəssamları Xalidə Səfərova və Mahmud Tağıyevin zəngin sənət irsinə həsr olunub. Oktyabrın 28-də Xalidə Səfərova və Mahmud Tağıyevin yaradıcılığına həsr olunmuş “Rəngkarlıq və qrafika” albomunun təqdimatına və görkəmli sənətkarların əsərlərindən ibarət sərginin açılışına həsr olunmuş tədbir keçirildi.

  

   Tədbirdə Azərbaycan Rəssamlar İttifaqının sədri, Xalq rəssamı Fərhad Xəlilov, ittifaqın katibi, Xalq rəssamı Ağəli İbrahimov, görkəmli bəstəkar, Xalq artisti Xəyyam Mirzəzadə, sənətşünas, Əməkdar incəsənət xadimi Ziyadxan Əliyev və başqaları çıxış edərək uzun illər həyatda və sənətdə qoşa addımlamış Xalidə Səfərova və Mahmud Tağıyevin yaradıcılığından söz açdılar.

   Qeyd olundu ki, 55 il xoşbəxt ailə həyatı sürmüş iki sənətkarı tale Ə.Əzimzadə adına Bakı Rəssamlıq Məktəbində qovuşdurub. Bu “ittifaq” onların ömürlərinin sonuna kimi davam edərək tükənməz xoşbəxtliyə çevrilib, sevgi və yaradıcılıq mənbəyi olub. Onlar Azərbaycanın dilbər guşələrini, təbiəti, tarixi yerləri, müxtəlif peşə sahiblərini, natürmortları öz əsərlərində canlandırıblar. Rəssamların müraciət etdikləri mövzuların, motivlərin oxşarlıqlarına baxmayaraq, yaratdıqları əsərlər bədii forma, plastik həll baxımından tam fərqlidir. M.Tağıyevin əsərlərinə monumental miqyaslılıq xasdırsa, onlarda epik düşüncəyə meyllilik özünü göstərirsə, X.Səfərova təbiətin gözəlliyini incə duyumu ilə yanaşı, müasir dövrün döyünən ritmi ilə təsvir etməyə meylli olub. Onların hər birinin yaradıcılıqda öz yolu, öz bədii vəzifəsi vardı.

   Sonda X.Səfərova və M.Tağıyevin ailəsi adından övladları, rəssam Əkrəm Tağıyev çıxış edərək tədbir iştirakçılarına, təşkilatçılara öz minnətdarlığını bildirdi. Qeyd edək ki, Xalidə Səfərova və Mahmud Tağıyevin əsərlərinin ekspozisiyası “Xalq Bank”ın baş ofisində gələn il yanvarın 30-dək nümayiş olunacaq.

  

 

   İradə Əsədova

 

   Mədəniyyət.- 2011.- 2 noyabr.- S. 15.