Dünyanın
kukla teatrları
Qədim tarix və müasir
inkişaf
Noyabrın 1-də Bakıda Beynəlxalq Kukla Teatrları
Festivalı başlayıb. Ölkəmizdə də
özünəməxsus inkişaf tarixi olan kukla teatrı sənəti
dünyada hələ qədim zamanlardan geniş
yayılıb. Bu yazıda dünya kukla teatrları tarixinə
nəzər salmaq istəyirik.
Hələ eramızdan 2 min il əvvəl
Misirdə ilk kukla tamaşalarının, xalq oyunlarının
göstərildiyinə dair dəlillər mövcuddur. Belə
xalq tamaşalarından biri məftillə idarə edilən
taxta fiqurlarla nümayiş etdirilən xəmiryoğurma oyunu
olub. Gildən, fil sümüyündən düzəldilmiş
kuklalar Misirdə qədim qəbirlərdə tapılıb.
Heroqliflər də qədim Misir dini dramlarında istifadə
edilən «gəzən heykəllər»i təsvir edir. Kukla
teatrı ilə bağlı ən qədim məlumatı
yunan tarixçisi Ksenofontun eradan əvvəl 422-ci ilə aid
yazılarında tapmaq olar.
Çində kukla teatrının təxminən
2 min il tarixi var. Onun adı «Pi-yinq xi», yəni «Fənər kölgələrinin
teatrı» və yaxud bu gün
hər kəsə bəlli olan «Çin kölgə teatrı» adlanır. Çində Sonq sülaləsinin dövründə
(960-1279) kukla teatrı
tamaşalarına cəmiyyətin
bütün təbəqələri,
o cümlədən ali silk nümayəndələri
həvəslə baxırdı.
Halbuki bu dövrdə Avropada kukla teatrı aktyorları cəmiyyətdə aşağı
sosial təbəqə
hesab edilirdilər.
Dünyada elm-texniki kəşfləri
ilə tanınan Yaponiya həm də kukla mədəniyyəti
ilə məşhurdur.
Artıq
uzun illərdir ki, bu ölkə
özünün ənənəvi
kukla istehsalına malikdir. Yaponiyada kukla teatrlarının
çoxlu formaları
var. Onlardan biri - Bunraku - sintoizm (Yaponiyada ənənəvi
din) məbədlərində keçirilən ayinlərdə
inkişaf edərək
yüksək səviyyəli
kukla teatrı formasına çevrilib.
Onun əsasını Yaponiyanın
ən böyük dramaturqu hesab edilən Çikamatsu Monzamon qoyub. O, Kabuki teatrı (ənənəvi
yapon teatrı) üçün pyes yazmaqdan imtina edərək, öz fikirlərini xüsusi olaraq Bunraku kukla pyesi üzərində
cəmləşdirdi. Əvvəlcə bir, 1730-cu ildən isə üç aktyorun idarə etdiyi kukla teatrı
tamaşası tədricən
geniş yayıldı.
Başdan-ayağa qara geyimdə
olan aktyorlar qara fona qarşı
dayananda görünməz
olurdular. Səhnə məşəllərlə
işıqlandırılanda isə yalnız taxta kuklalar görünürdü.
Koreyada kukla teatrı
ənənəsinin Çindən
gəldiyi güman edilir. Koreyada kukla sözü
«gapsi», yəni «gəlin» və ya «gənc qadın»
mənasını verir.
Tailandda isə kukla teatrlarının populyar forması olan “Hun Krabok” adlı taxta kuklalar teatrı var. Hindistan da böyük kukla teatrı ənənəsinə malikdir.
Böyük hind əfsanəsi “Mahabarata”da kuklalara istinadlar yer alıb. Bu ölkənin
Rajastani kukla teatrı çox məşhurdur. İndoneziyada da kukla teatrı
güclü ənənəyə
malikdir.
Orta Şərq
Orta Şərqdə və ümumilikdə müsəlman dünyasında,
başqa teatr formaları kimi, kukla teatrlarına da İslam mədəniyyəti
təsir edib. Türk kölgə teatrı olan “Qaragöz” teatrının Anadoluya Çin və Hindistandan gəldiyi bildirilir. Başqa bir versiyaya görə, kölgə teatrı Anadoluya XVI əsrdə Misirdən gəlib. Bu fikrin
müdafiəçiləri iddia edirlər ki, kölgə teatrı Sultan Səlimin
1517-ci ildə Misiri işğalından sonra Osmanlı sarayına yol tapıb. Deyilənə görə, onun
şərəfinə düzənlənən
mərasimdə kölgə
teatrı tamaşası
Sultan Səlimi o qədər
təsirləndirir ki,
o, kukla teatrı aktyorlarını özü
ilə İstanbula gətirir.
İranda isə kukla
teatrları daha erkən meydana gəlib. Lakin başlanğıcda təkcə əlcək və məftilli kuklalar məşhur idi. Kukla teatrının başqa
janrı isə Qacar dövründə
(XVIII-XIX əsrdə) Türkiyənin
regiona təsiri altında meydana gəldi. Ənənəvi
fars kuklası
“Xeyme Şab-Bəzi”nin
ifasında musiqinin müşayiəti ilə
söylənən nağıl-tamaşalar
əsasən çayxanalarda
nümayiş olunurdu.
Qədim Yunanıstan və Roma
Baxmayaraq ki, qədim yunan kuklalarından çox az
nümunə qalıb,
tarixi ədəbiyyat bu ölkədə kukla teatrının vaxtilə geniş yayıldığını göstərir.
Homerin məşhur “İliada” və “Odisseya” əsərləri vaxtilə
kukla teatrı tamaşalarında təqdim
edilirdi. Avropada kukla
teatrının kökləri
də Yunanıstandan götürülüb. Qədim
qəbirlərdə tapılan
yunan və Roma gil kuklalarının
eradan əvvəl V əsrə aid olduğu bildirilir. Sonralar İtaliyada kilsələrdə
dini-əxlaqi mövzuda
marionet (kukla) tamaşaları göstərilirdi.
Marionet -
İsa peyğəmbərin
anası müqəddəs
Məryəmin kiçik
fiquruna deyilirdi. Sonralar bu oyuncaqlar kukla
teatrında geniş istifadə edildi və bəzən Şekspirin pyesləri aktyorlar əvəzinə marionetlərdən istifadə
edilərək səhnələşdirilirdi.
XVIII və XIX əsrlərdə, marionet
teatrı daxil olmaqla, İtaliya kukla teatrı geniş inkişaf etdi. Çubuqlu kuklalar daha çox aşağı təbəqədə, marionet
teatrı isə aristokrat dairədə populyar idi. O zaman kukla teatrları,
İtaliyanın hər
yerində, xüsusilə,
Venesiyada populyar idi.
Britaniya, Almaniya, Avstriya və Çexiyada kukla teatrı ənənələri
Punç və Cudi ingilis kukla teatrı
İtaliya komediya ənənəsindən götürülüb.
XX əsrin əvvəllərində
Britaniya Kukla Teatrı və Nümunəvi Teatr Gildiyası kukla teatrlarının yüksəlişinə
çalışırdı. Hazırda Böyük Britaniyada çoxlu kukla teatrları fəaliyyət
göstərir. Almaniyada və
Avstriyada kukla teatrı qədim ənənəyə malikdir.
Onlar da XVI əsr İtaliya komediya ənənəsindən götürülüb.
XVIII əsrdə operalar xüsusi olaraq marionet kuklalar üçün bəstələnirdi. Kukla teatrları
üçün pyeslər
yazılırdı. Əsası 1913-cü ildə professor Anton Ayçer
tərəfindən qoyulan
Salzburq marionet teatrı bu gün də dünyada məşhurdur.
Bu teatrda hələ
də kuklalardan istifadə edərək
opera tamaşaları göstərilir.
Çexiyada da kukla teatrları orta əsrlərdən mövcud
olub. XX əsrin
40-cı illərində kuklalardan
animasiya filmlərində
geniş istifadə olunmağa başlandı.
Afrika və Amerikada kukla teatrları
Afrika ölkələrində kukla ənənələri
qədim Misirdən götürülüb. Bundan əlavə,
Afrikada bəzi etnik qruplar hələ
də müxtəlif mərasimlərdə (məsələn,
ov) kukla və maskadan istifadə edirlər.
Bu gün kukla
teatrı təntənəli
mərasimlərdə, rəqs,
hekayə və maskalı tamaşalar daxil olmaqla, geniş yayılmış
folklor formasında davam etdirilir. Meksikada VI əsrə aid qədim kukla nümunələri tapılıb. Ümumilikdə isə Amerikaya kukla ənənələrini
avropalılar gətiriblər.
Tədricən Amerikada kuklaların
müxtəlif xarakter,
forma və fərqli üslubları inkişaf etdi. XX əsrin
ortalarında ABŞ-da
televiziya kukla teatrları yarandı.
Sonralar kuklalardan televiziya şoularında və filmlərdə geniş istifadə olunmağa başlandı.
XX əsr
boyu kukla teatrı müxtəlif yollarla inkişaf etdi. Paralel olaraq kinonun,
televiziyanın inkişafı
ilə dəstəklənən
kukla teatrı hazırda geniş auditoriyaya malikdir.
Mehparə
Mədəniyyət.-
2011.- 2 noyabr.- S. 7.