“Azərbaycan xalçaları - İrəvan qrupu”

Tarixi həqiqətləri əks etdirən ensiklopedik nəşr

Noyabrın 3-də “Azərilmə” Məhdud Məsuliyyətli Cəmiyyətinin “Sehrli ilmələr” qalereyasında Azərbaycan Milli Elmlər Akademiyası A.A.Bakıxanov adına Tarix İnstitutu Elmi Şurasının qərarı ilə nəşr olunmuş “Azərbaycan xalçaları - İrəvan qrupu” kitabının təqdimat mərasimi keçirilib.

Tədbirdə çıxış edən natiqlər kitabın məziyyətlərindən danışıblar. Bildirilib ki, kitabda Azərbaycan torpaqları olan Qərbi Azərbaycanın tarixinə ətraflı nəzər salınıb, İrəvan qrupu xalçalarının xarakteristikasından geniş bəhs olunaraq 102 nadir xalçanın şəkli verilib. Kitaba salınmış hər bir xalçanın çeşnisi, rəng ahəngi, semantikası, insanların ətraf mühitə və inkişafa dair fəlsəfi baxışları onların Azərbaycan gerçəkliyinin əks olunduğunu qəti şəkildə ortaya qoyur.

Kitabın ön səhifəsində Prezident İlham Əliyevin dediyi: “...İrəvan Ermənistana Azərbaycan Xalq Cümhuriyyəti yarananda, məhz Azərbaycan Xalq Cümhuriyyəti tərəfindən verilmişdir. İrəvan xanlığında yaşayan insanların əksəriyyəti azərbaycanlı idi. Zəngəzur mahalında yaşayanların hamısı azərbaycanlı idi. Ona görə, tarixi baxımdan da bu bizim torpaqlardır” fikri yer alıb.

Kitab Milli Məclisin deputatı, Azərbaycan Milli Elmlər Akademiyasının müxbir üzvü, tarix elmləri doktoru, professor Yaqub Mahmudovun elmi redaktorluğu ilə çap edilib.

Mədəniyyət.- 2011.- 4 noyabr.- S. 15.