Yazıçı-dramaturq Aqşin Babayevin 75 yaşı tamam olur

Tanınmış yazıçı-dramaturq, tərcüməçi, şair, ədəbiyyatşünas alim, professor Aqşin Əlisəttar oğlu Babayev 1936-cı il noyabrın 23-də anadan olub.

Orta məktəbi bitirdikdən sonra 1954-1959-cu illərdə ADU-nun (indiki BDU) Filologiya fakültəsində təhsil alıb. Ədəbi yaradıcılığa tələbəlik dövrü “Oktyabr işıqları” almanaxında çap olunan “Azadlıq uğrunda” hekayəsi ilə başlayıb. 1961-1965-ci illərdə ADU-nun Şərqşünaslıq fakültəsində türk ədəbiyyatı üzrə aspiranturanı bitirib. “Nazim Hikmətin dramaturgiyası” mövzusunda namizədlik dissertasiyasını müdafiə edib.

Aqşin Babayev 32 il Dövlət Televiziya və Radio Verilişləri Komitəsində müxtəlif vəzifələrdə işləyib, komitədə sədr müavini olub, Azərbaycan radiosuna və xarici verilişlər redaksiyasına rəhbərlik edib. Bir müddət (1972-1975) Türkiyədə tərcüməçi kimi çalışıb, on ilə yaxın «Moskou nyus» qəzetinin Azərbaycan üzrə xüsusi müxbiri kimi fəaliyyət göstərib. 1991-2006-cı illərdə Milli Məclis Aparatının Mətbuat xidməti şöbəsinin müdiri olub.

Aqşin Babayev 30-dək kitabın müəllifidir. Povestləri, hekayələri Türkiyə, İraq, Gürcüstan, Moldova, Belarus, Ukrayna və başqa ölkələrdə dərc edilib. Yazıçı-dramaturqun «Oğul», «Xilaskar», «Yaralar», «Kim nə deyər...», «Olmuş əhvalat», «Əlin cibində olsun», «Şeytanın yubileyi» və s. pyesləri və librettoları, «Bir parça həyat», «Nekroloq», «Dəvətnamə», «Mükafat» telefilmləri tamaşaçı rəğbəti qazanıb. 1996-cı ildə “ Kişilər az yaşadı” povest və hekayələr toplusu Moskvada rus dilində kütləvi tirajla nəşr olunub. «Bir içim su istədim» adlı şeirlər kitabı 2003-cü ildə işıq üzü görüb. Onun şeirlərinə mahnılar bəstələnib.

Aqşin Babayev Nazim Hikmətin tədqiqatçısı kimi tanınır. O, Türkiyənin Nazim Hikmət Kültür və Sənət Vəqfinin fəxri üzvüdür. Azərbaycan Ensiklopediyasında türk ədəbiyyatına aid əksər oçerklərin müəllifidir. «Nazim Hikmət yaşamı» əsəri (1989) Berlində çap olunub.

O, ədəbi-elmi yaradıcılığı ilə yanaşı tərcüməçilik sahəsində də fəaliyyət göstərib. İtalyan dramaturqu Terensinin «Qardaşlar», türk dramaturqu Haldun Tanerin «Keşanlı Əli dastanı» pyeslərini, Əziz Nesinin «Hekayələr» kitabını, Avstriya yazıçısı Stefan Sveyqin “Naməlum qadının məktubları”nı Azərbaycan dilinə çevirib.

Xidmətlərinə görə “Əmək rəşadəti”, “Əmək veteranı” medalları, Azərbaycan Ali Sovetinin Fəxri fərmanı ilə təltif edilib. Azərbaycan Yazıçılar Birliyinin üzvü, Azərbaycan Əməkdar jurnalisti, 1996-cı ildən filologiya elmləri doktoru, 1998-ci ildən professordur. Mədəniyyət və İncəsənət Universitetinin «Ədəbi yaradıcılıq» kafedrasının müdiridir.

Aqşin Babayevin əsərlərində nəzərə çarpan xüsusiyyətlərdən biri onların insan qəlbinə yol açması, insanda dərin hisslər oyatmasıdır. Əslinə baxanda bu keyfiyyət olmayan yerdə sənət əsəri yoxdur. Axı yazıçı, bəstəkar, rəssam ancaq o zaman öz fikrini, öz ideyasını başqalarına aşılaya bilər ki, onları sevindirə, kədərləndirə, həyəcanlandıra bilsin, onların qəlbində müxtəlif hisslər oyatsın. Yazıçının əsərləri cəmiyyətdəki inamın, insan həyatındakı işıqlı, gözəl, müqəddəs təzahürlərə hərarətli məhəbbətin məhsuludur. Həm də bu məhəbbət, bu inam zahiri dəbdəbədən uzaqdır, iddiasızdır. Yazıçının novellalarında insan ürəyinin bir guşəsi, zəngin, rəngarəng həyatımızın bir lövhəsi, mənəvi aləmimizin həssas simlərinə toxunulur. O, insanların yüksək əxlaqını, mənəvi gözəlliyini, insanpərvərliyini, cəmiyyətdə, ailədə, yoldaşlıqda düzlük, sədaqət kimi uca duyğuları məhəbbətlə təsvir etməklə yanaşı, həyatın ziddiyyətlərini, mənfi təzahürləri və neqativ cəhətlərini də qələmə alıb.

Noyabrın 23-də Aqşin Babayevin anadan olmasının 75 ili tamam olur. Səbail rayon MKS-in rəhbərliyi və kollektivi yazıçını yubiley münasibətilə təbrik edir, ona uzun ömür, cansağlığı, yeni yaradıcılıq uğurları arzulayır.

Şəbnəm Babaşova,

Səbail rayon MKS-in baş metodisti

Mədəniyyət.- 2011.- 23 noyabr.- S. 14.