Argentina Milli Kitabxanasında Azərbaycanla bağlı fond yaradılıb

 

Noyabrın 21-də Argentinanın paytaxtı Buenos-Ayresdə Azərbaycanın dövlət müstəqilliyinin bərpasının 20-ci ildönümünün qeyd edilməsi çərçivəsində tədbirlər həftəsi başlayıb. Azərbaycandan millət vəkillərinin iştirak etdiyi ilk tədbir Argentina Milli Kitabxanasında Azərbaycanla bağlı nəşrlərdən ibarət fondun təqdimat mərasimi olub.

 

Tədbirdə çıxış edən ölkəmizin Argentinadakı səfiri Məmməd Əhmədzadə Latın Amerikasının aparıcı elmi, intellektual mədəni mərkəzlərindən birində Azərbaycanla bağlı nəşrlərdən ibarət fondun yaradılmasını yüksək qiymətləndirib, fondun daha da zənginləşdirilməsinə səfirliyin daimi dəstək verəcəyini deyib. Diplomat səfirlik tərəfindən Argentina Milli Kitabxanasına hədiyyə olunan ölkəmiz haqqında 100-dən artıq kitab, jurnal materiallardan ibarət nəşrlərin siyahısını Heydər Əliyev Fondunun hazırladığı Azərbaycan kitabını Argentina Milli Kitabxanasının prezidenti Horasio Qonzalesə təqdim edib.

Azərbaycan nümayəndə heyəti adından çıxış edən millət vəkili Asim Mollazadə respublikamızın tarixən müxtəlif sivilizasiyaların qovşağında yerləşən çoxmədəniyyətli bir ölkə olduğunu vurğulayıb. Millət vəkili Azərbaycanın qədim zəngin tarixi-mədəni irsindən danışaraq bu gün ölkəmizin sivilizasiyalararası dialoqa, habelə Xəzər bölgəsi ilə Avropa arasında əməkdaşlığa verdiyi töhfələrdən bəhs edib.

Tədbirdə Azərbaycanla bağlı yaradılan fonddakı nəşrlərin, ölkəmizin görməli yerlərinin fotosərgisi nümayiş olunub, qonaqlara milli mətbəximizin nümunələri təqdim olunub.

 

 

Həmidə

 

Mədəniyyət.- 2011.- 25 noyabr.- S. 11.