Altın
çağın incisi «Koroğlu»
Üzeyir Hacıbəylinin anım günündə bəstəkarın
şah əsərinə həsr olunmuş kitabın təqdimatı
keçirildi
Noyabrın
23-də dahi bəstəkar, Azərbaycan professional musiqisinin
banisi Üzeyir Hacıbəylinin vəfatından 63 il
ötdü. Həmin gün Üzeyir Hacıbəylinin
ev-muzeyində anım tədbiri və TÜRKSOY-un təşkilatçılığı
ilə Türkiyədə işıq üzü görən
“Altın çağın incisi “Koroğlu” kitabının təqdimat
mərasimi keçirildi.
“Koroğlu” operasına həsr
olunmuş kitabın müəllifi Azərbaycanın Əməkdar
incəsənət xadimi, Türkiyənin Qazi Universitetinin
professoru Əflatun Nemətzadədir. Türk və ingilis dillərində
çap edilmiş kitabın ön səhifəsində
Türkiyə prezidenti Abdullah Gülün və Azərbaycan
prezidenti İlham Əliyevin Üzeyir Hacıbəyli
yaradıcılığı haqqında, eləcə də
“Koroğlu” operası barədə dəyərli fikirləri
yer alıb. Kitabın ön söz müəllifi TÜRKSOY-un
baş katibi Düsen Kaseinovdur.
Tədbiri muzeyin direktoru, Əməkdar
incəsənət xadimi Sərdar Fərəcov açaraq
Üzeyir Hacıbəylinin xatirə günündə təqdim
olunan kitabın əhəmiyyətindən danışdı:
«Azərbaycan xalqı Üzeyir bəyi heç vaxt
unutmayıb. Onun dahiyanə əməlləri yaşayır.
Üzeyir bəyi sevənlər həmişə onun
işığına toplaşır və xatirəsini yad
edirlər. Üzeyir bəyin «Koroğlu» operası son bir
neçə ildə TÜRKSOY-un xətti ilə türkdilli
ölkələrin səhnələrində oynanılıb.
“Altın çağın incisi “Koroğlu» kitabı
operanın dünya səhnələrində
qazandığı zəfəri əks etdirir».
Tədbirdə
çıxış edən kitabın müəllifi Əflatun
Nemətzadə bildirdi ki, Üzeyir Hacıbəylinin şah əsəri
Azərbaycan, Türkiyə, Qazaxıstan,
Qırğızıstan, Tatarıstan və
Başqırdıstandan 250 sənətçinin
iştirakı ilə Bişkek, Almatı, Ankara və Bakı
şəhərlərində böyük uğurla
nümayiş olunub. Kitabda TÜRKSOY-un təşkilatçılığı
ilə səhnəyə qoyulan “Koroğlu” operasının
tamaşaları haqqında məlumatlar və fotolar yer
alıb. Yaxın vaxtlarda kitabın ikinci hissəsi də
çap ediləcək. Əflatun Nemətzadə onu da qeyd
etdi ki, 2012-ci ildə Roma və Milanda “Koroğlu”
operasının nümayişi nəzərdə tutulub. Sonda
müəllif “Altın çağın incisi “Koroğlu»
kitabını muzeyə təqdim etdi.
Tədbirdə Xalq artisti, bəstəkar
Xəyyam Mirzəzadə Üzeyir bəylə bağlı
xatirələrini danışdı, uşaqlıq illərindən
qalan bu xatirələrin yaddaşına əbədi həkk
olunduğunu dedi.
Gülər
Mədəniyyət.-
2011.- 25 noyabr.- S. 5.