Azərbaycanın mədəni həyatında unikal hadisə

İlk dəfə olaraq tarix-mədəniyyət abidəsi sığortalanıb

Noyabrın 23-də ölkəmizin mədəni həyatında bir ilkə imza atıldı. “Atəşgah” Sığorta Qrupu tərəfindən dünya əhəmiyyətli tarix-memarlıq abidəsi olan “Atəşgah” məbədi”nin sığortalanması ilə bağlı sığorta polisinin təqdimetmə mərasimi keçirildi.

Paytaxtdakı “Hyatt Regency” mehmanxanasında keçirilən mərasimdə çıxış edən mədəniyyət və turizm nazirinin birinci müavini Vaqif Əliyev dünyanın ən unikal tarix-memarlıq abidələrindən biri olan “Atəşgah” məbədinin sığortalanması ilə bağlı təşəbbüsü yüksək qiymətləndirdi: “Azərbaycan mədəni irsinin nadir nümunəsi olan «Atəşgah» məbədinin «Atəşgah» şirkəti tərəfindən sığortalanması unikal hadisədir».

Vaqif Əliyev son illər beynəlxalq aləmdə mədəniyyətimizin daha geniş şəkildə tanıdılması üçün məqsədyönlü işlər görüldüyünü də vurğuladı: «Bu tədbirlər ölkə prezidentinin daim diqqət mərkəzindədir. Heydər Əliyev Fondunun prezidenti, UNESCO-nun xoşməramlı səfiri Mehriban xanım Əliyevanın təşəbbüsü və rəhbərliyi ilə böyük layihələr həyata keçirilir. Bu işlərin nəticəsidir ki, bir sıra abidələrimiz UNESCO-nun mədəni irs siyahısına daxil edilib. «Atəşgah» məbədinin sığortalanması Azərbaycanda abidələrin qorunmasına göstərilən diqqəti bir daha beynəlxalq aləmə nümayiş etdirəcək. Ona görə də bu tədbiri tarixi hadisə kimi dəyərləndirmək olar».

Vaqif Əliyev abidələrimizə göstərilən dövlət qayğısından da bəhs etdi: «Hələ dörd il əvvəl “Atəşgah” qoruğunun təmir və bərpası üçün dövlət başçısı tərəfindən xüsusi sərəncam da imzalanmışdı. Bildiyiniz kimi, sovet dövründə abidələrimizə diqqət ayrılmırdı və ona görə də bu qoruğun ətrafında ayrı-ayrı tikililər var idi. İndi isə abidənin qorunması və mədəni obyekt kimi mövcud olması üçün lazımi işlər görülür. İnanıram ki, abidənin sığortalanması Azərbaycanın mədəni həyatında atılmış önəmli addım olacaq və belə layihələr davamlı şəkildə həyata keçiriləcək».

«Atəşgah» Sığorta Şirkətinin idarə heyətinin sədr müavini Əkbər Mədətli bildirdi ki, təmsil etdiyi şirkət Azərbaycan sığorta bazarında ön sıralarda olmaqla yanaşı, həm də cəmiyyətdə öz yenilikləri ilə tanınır: «Bu yenilikçi ənənəsinə sadiq qalan «Atəşgah» Sığorta Qrupu ölkə tarixində ilk dəfə mədəni tarixi abidəni sığortalayır. Bu il şirkətimizin 15 yaşı tamam olur. Bu müddət ərzində «Atəşgah» hər zaman cəmiyyətimizə, onun gələcəyinə fayda verməyə çalışıb. Bu gün də bu istiqamətdə növbəti addımı atıb”.

Əkbər Mədətli qeyd etdi ki, Abşeron yarımadasında Köhnə Suraxanı qəsəbəsində yerləşən «Atəşgah» məbədi şirkətin vəsaiti hesabına 3 milyon dollar məbləğində sığortalanıb. Onun sözlərinə görə, bununla bağlı sığorta müqaviləsi üzrə risklər Avropanın sığorta bazarında təkrar sığortalanıb. Ə.Mədətli onu da vurğuladı ki, «Atəşgah» şirkəti mədəniyyətimizə bundan sonra da fayda vermək niyyətindədir: «Sığorta Qrupunun adı onun xalqımızın tarixi və mədəni dəyərlərinə bağlılığından, qədim adət-ənənlərimizə ehtiramından xəbər verir. Bildiyiniz kimi, dünya təcrübəsində sığorta şirkətlərinin tarixi-mədəni abidələri sığortalamaq təcrübəsi var. Biz bu yöndə ilk təşəbbüsü göstərək digər sığorta şirkətlərimizi də belə addımlar atmağa çağırırıq».

Sonra “Atəşgah» Sığorta Qrupunun “Atəşgah” məbədinin sığortalanması ilə bağlı müvafiq sığorta şəhadətnaməsi şirkətin idarə heyətinin sədri Tələt Səfərov tərəfindən mədəniyyət və turizm nazirinin birinci müavini Vaqif Əliyevə təqdim olundu.

Mehparə

Mədəniyyət.- 2011.- 25 noyabr.- S. 4.