“Maestro.

Özüm və zaman haqqında”

Görkəmli bəstəkar Xəyyam Mirzəzadəyə həsr olunmuş sənədli film təqdim olundu

Oktyabrın 4-də Dövlət Rus Dram Teatrında görkəmli bəstəkar, Xalq artisti Xəyyam Mirzəzadənin həyat və yaradıcılığına həsr olunmuş “Maestro. Özüm və zaman haqqında” sənədli filminin təqdimatı keçirildi. Film Mədəniyyət və Turizm Nazirliyinin sifarişi ilə lentə alınıb.

Tədbirdə çıxış edən mədəniyyət və turizm naziri Əbülfəs Qarayev Xalq artisti, professor Xəyyam Mirzəzadənin Azərbaycan incəsənətində özünəməxsus yer tutduğunu, bəstəkarın müxtəlif janrlarda yazdığı əsərlərlə musiqi xəzinəmizə böyük töhfələr verdiyini vurğuladı. Qeyd olundu ki, bəstəkarın musiqi sənətinin inkişafında xidmətləri dövlət tərəfindən yüksək qiymətləndirilib, prezident İlham Əliyev sənətkarın “Şərəf” ordeni ilə təltif olunması barədə sərəncam imzalayıb.

“Maestro. Özüm və zaman haqqında” filminin görkəmli bəstəkarın 75 illik yubileyinə həsr olunduğunu bildirən nazir maestronun növbəti yubileylərində də yeni-yeni filmlərin çəkilməsini arzu etdiyini dedi.

Sonra nazir Əbülfəs Qarayev “Şərəf” ordenini Xəyyam Mirzəzadəyə təqdim etdi. Xəyyam Mirzəzadə sənətinə və əməyinə dövlət tərəfindən verilən yüksək qiymətə görə minnətdarlığını ifadə etdi. Bundan öncə ümummilli lider Heydər Əliyev tərəfindən “Şöhrət” ordeni ilə təltif olunduğunu söylədi.

Bəstəkar professional musiqi sənətində əldə etdiyi nailiyyətlərə görə müəllimi, dahi bəstəkar Qara Qarayevə minnətdar olduğunu, onu hər zaman xoş xatirələrlə yad etdiyini vurğuladı.

Daha sonra film nümayiş olundu. “Salnamə” və “Cinealliance” studiyalarının birgə istehsalı olan filmin ssenari müəllifi və rejissoru Xalq artisti Tofiq İsmayılov, operatoru Ziya Babayev, musiqi redaktoru Rauf Əliyev, redaktoru Ramiz Əliyevdir. Filmin qəhrəmanı öz həyatı və sənəti haqqında, müəllimləri, dostları, tələbələri haqqında düşüncələri ilə tamaşaçılarla bölüşür.

Filmin nümayişindən sonra yaradıcı heyət səhnəyə çıxaraq çəkiliş prosesi barədə danışdı.

Reyhan

Mədəniyyət.- 2011.- 5 oktyabr.- S. 2.