“Yaxın Şərq ölkələrində çap və nəşriyyat işi“

Ölkəmiz Misirdə keçirilən beynəlxalq simpoziumda təmsil olunub

Bu günlərdə Misirin İsgəndəriyyə şəhərində “Yaxın Şərq ölkələrində çap və nəşriyyat işi“ adlı IV beynəlxalq simpozium keçirilib.

Respublikamızı bu tədbirdə Milli Azərbaycan Tarixi Muzeyinin ekspozisiya işləri üzrə direktor müavini Həbibə Əliyeva və elmi-maarif və sərgilərin təşkili şöbəsinin elmi işçisi Səidə Həmzəbəyova təmsil ediblər.

İsgəndəriyyə şəhər kitabxanasında keçirilən tədbirdə Fransa, İran, Almaniya, ABŞ, İordaniya, Türkiyə, İtaliya və s. ölkələr də təmsil olunub. Simpoziumda tarix, arxeologiya, epiqrafika mövzusunda məruzələr dinlənilib. Tarix Muzeyinin direktor müavini Həbibə Əliyeva tədbirdə “XVI-XVII əsrlərdə Azərbaycan kalliqrafiyası” mövzusunda məruzə ilə çıxış edib. Məruzə ilə yanaşı ingilis dilində titrlərlə müşayiət olunan elektron slaydlarda Azərbaycan kalliqrafik nümunələri (mədəniyyət abidələri, yazılı əsərlər) təqdim edilib “Məruzədə ölkəmizdə kalliqrafiya sənətinin təşəkkülü və təkamülünün tarixi baxımdan təhlili, azərbaycanlı xəttatların ərəb xətt növlərindən yetərincə faydalanmaları və milli əlavələr edilməsi ilə bağlı qeydlər öz əksini tapmışdı”.

Muzeyin elmi-maarif və sərgilərin təşkili şöbəsinin elmi işçisi Səidə Həmzəbəyova isə ingilis dilində “Hadi Əhmədin əsərində xəttatlar (oriyentalist-professor V.F.Minorskinin tədqiqatlarına istinadən)“ adlı məruzə ilə çıxış edib. O, Səfəvi dövründə fəaliyyət göstərən Azərbaycan kalliqraflarının dünya xəttatlığına təsiri faktını vurğulayaraq, azərbaycanlı sənətkarların əsərlərindən ibarət slaydı tamaşaçıların diqqətinə çatdırıb.

Simpoziumdan sonra iştirakçılara yazılı təşəkkürnamə təqdim edilib. İştirakçılar mədəni proqram çərçivəsində İsgəndəriyyə şəhərinin qədim abidələri ilə tanış olublar.

Savalan Fərəcov

Mədəniyyət.- 2011.- 7 oktyabr.- S. 6.