“Mən xalqın sevdiyi xalq artistiyəm”

Oktyabrın 16-da Mədəniyyət və Turizm Nazirliyinin təşkilatçılığı ilə Akademik Milli Dram Teatrında görkəmli aktyor, Xalq artisti, “Şöhrət” ordenli Yaşar Nurinin 60 illik yubileyi qeyd olunacaq. Tədbirdə sənətkarın həyat və yaradıcılıq yolunu əks etdirən fotolar də sərgilənəcək. Fotosərgi Cəfər Cabbarlı adına Dövlət Teatr Muzeyinin dəstəyi ilə hazırlanıb.

Ötən ay “Space” televiziyasında Xalq artisti Yaşar Nurinin 60 illik yubileyini qeyd etdilər. Özü də yüksək səviyyədə. Sonda səbəbkar danışdı, özü də necə danışdı. Bu tarixi çıxışın nöqtəsinə, vergülünə toxunmadan sizlərə təqdim edirik:

- 60 yaş əsil kişi yaşıdır. İndi deməyə ixtiyarım çatır ki, mən xalqın tanıdığı, xalqın sevdiyi Xalq artistiyəm. Dostlarıma sadiq, torpağıma sadiq Xalq artistiyəm. Mən Akademik Milli Dram Teatrının kollektivinə borcluyam. Onlar məni yetişdiriblər, səhvlərimə dözüblər. Mən səhvlərimə borcluyam, böyük səhv yox ha, xırda səhvlərimə. Yenidən doğulsaydım yenə də o səhvləri eləyərdim. (Gülür) Əvvəla, təzədən nöş doğuluram, nolub bəyəm, bayram zaddır?! Yaşar kimi oğullar əslində bir dəfə doğulur. Təzədən dünyaya gəlsəydim yenə bu sənəti seçərdim. Necə yaşamışam, o səhvlərimlə - nöqtəsi ilə, vergülü ilə, nidası ilə, apostrof moddan düşüb, apostrofu ilə yenə yaşayardım. Yaşamaq istəyirəm, həyatı həyat kimi yaşamaq istəyirəm!

Ömrün 60-cı zirvəsində Yaşar Nuri özünü belə təbrik etdi. Canlı efirə baxan hər kəs də sevimli aktyorunu ürəyində təbrik etdi. Üç sənət adamının təbrikini də “Yaşa, yüz il yaşa!” - deyib qəzetimiz vasitəsi ilə xalqın çox sevdiyi sənətkara çatdırırıq.

“Yaşar, arzuladığın qədər yaşa”

Yaşar kütlənin aktyorudur, millətin, xalqın aktyorudur, Molla Nəsrəddin teatrının aktyorudur, meydanın epataj aktyorudur, məhəllənin baməzə qədeş aktyorudur, tünd, parlaq, koloritli boyalarla işləyib səhnədə və ya kinokadrda birdən-birə tufan, qasırğa qoparmağı, anındaca dəyişməyi, başqası olmağı xoşlayan aktyordur, müşahidəsi iti aktyordur, müxtəlif janrlar arasında kefi istəyən kimi gah “Qaytağı”, gah “Qıtqılıda”, gah da “Qoçəli” oynayan aktyordur. Kütlə Yaşarı sevir, Yaşar da - kütləni. Çünki o, hamının ürəyindən, fikrindən keçənləri sənətə gətirməyi bacarır, hamıya açıq olmağı bacarır, hamının qılığına girməyi bacarır. Xalq içində bu tip adamlara, adətən, deyirlər ki, “nağara dibindən çıxıb”. Nədən ki, onlar dünyanın hər üzünü bilirlər və tanıyırlar; uşaqla uşaq kimi ola bilirlər, böyüklə böyük kimi.

Hansı aktyorlarsa haçansa qocalırlar, köhnəlirlər. Yaşar isə heç vaxt qocalmır, köhnəlmir. Ona görə ki, daxilən çox mobildir, çevikdir, akkumulyativdir, diridir və hər zaman öz oyunundan, öz zarafatından, öz jestindən, danışığından həzz ala-ala yaşayır Yaşar.

Yaşar üçün yaş nədir ki... Olsa-olsa yalnız bir tamaşa... Bizsə pəncərədən baxan adamlar... Yaşar, arzuladığın qədər yaşa, doyunca yaşa, sən Azərbaycan mədəniyyəti üçün gərəkli birisisən...

Aydın Talıbzadə,

teatrşünas

* * *

Yaşa... yarat... yaşat!

Əzizim Yaşar, səni - xalqımın böyük sənətkarını, ləyaqətli oğlunu 60 illik yubileyin münasibətilə ürəkdən təbrik edirəm. Azərbaycan xalqı səni özünün MİLLİ SƏRVƏTİ hesab edir. Son illər səhhətinlə bağlı sənət dostlarını və səni sevən tamaşaçıları yaman həyəcanlandırdın. Arzum budur ki, yubiley bayramından sonra bizləri yalnız və yalnız səhnədən, efirdən, ekrandan həyəcanlandırasan.

Bu gün Azərbaycanda «ulduzlar» çoxdur, sən isə Azərbaycan teatrının tarixində iz qoymuş ƏSL ULDUZlardansan. Bu günə qədər yaratdığın obrazlar tükənməz istedadından mayalanıb, canından, qanından, əsəblərindən toxunulub.

Yaxşı yadımdadır, teatra gələndə sən artıq efirdən tanınmış məşhur aktyor idin. Ustadımız Tofiq Kazımov səninlə işləməyi çox sevirdi, məşğul olduğun tamaşalara hər dəfə baxmaqdan zövq alırdı. Sənin oyununa baxan zaman onun üzünü görməyin özü bir tamaşa idi. Sevinc və heyranlıq dolu bu üz YAŞARın bir aktyor kimi kimliyini, dəyərini, bənzərsizliyini bilən böyük rejissorun münasibətini güzgüləyirdi.

Sən 60 yaşa gəlib çıxdığın bu ecazkar sənətdə əsl insanşünas oldun. Janr məhdudiyyəti bilmədən bizləri GÜLDÜRDÜN... AĞLATDIN... DÜŞÜNDÜRDÜN...

... Əzizim Yaşar, həm xalq, həm dövlət, həm də sənət dostların sənin qədrini-qiymətini bilir.

Valideynlərin YAŞAR adı qoymaqla sənə xoşbəxt və uzun bir ömür yaşamağı diləyiblər. Onların arzusunu yerinə yetir. Yaşa... yarat... xalqına bol-bol sevinc payı bəxş elə...

Sən buna qadirsən!

Tələbə dostun Məryəm Əlizadə,

teatrşünas

* * *

“Yaşar Nuri özü təkbaşına bütöv bir teatrdır”

Yaşar Nuri anadan olduğu vaxtdan aktyor peşəsinin daşıyıcısıdır. Allah onu elə bu missiya ilə göndərib dünyaya, başqa sözlə, Yaşarın aktyorluğu qazanılmış, sonradan təhsillə və ya nəyləsə öyrənilən aktyorluq deyil, o, anadangəlmə aktyordur. Ona görə də o, özünü səhnədə suda balıq kimi rahat hiss edir, çox asanlıqla oynayır.

Yaşar onlarla maskası olan aktyordur. Bu maskaların komizmi, məqamında lirizmi, təkrarsızlığı, müxtəlifliyi, hər dəfə yenilənməsi və yeni-yeni maskaların rəsm edilməsi aktyorun əlində tum çırtlamaq qədər asan bir işdir. Bu həqiqətdə də belədir. Yaşarın bircə televiziya tamaşasında (Ruhəngiz Qasımova, Ramiz Həsənoğlu - “Qonşu qonşu olsa”) oynadığı 10-a yaxın müxtəlif obrazları yada salmaq kifayətdir. Bura aktyorun Vaqif Mustafayevin filmlərində oynadığı rolları da əlavə etsək, mənzərənin nə qədər əlvan olduğunu görə bilərik.

Yaşar Nuri özü təkbaşına bütöv bir teatrdır. 2009-cu ildə Gəncədə “Yeni teatr” festivalında mən, deyək ki, “Yaşar teatrı”nın səhnədənkənar çıxışlarının tamaşaçısı oldum. O, dramaturqsuz, rejissorsuz, səhnəsiz və dekorasiyasız saatlarla insanların diqqətini üzərində saxlaya bilirdi. Onun müəllifi olduğu söhbətlərindən, lətifə və improvizələrindən doymaq mümkün deyildi.

Yaşar ümumxalq məhəbbəti qazanmış sənətkardır, sözün həqiqi mənasında o, xalqın sənətkarı, xalqın artistidir. Bunu da mən Gəncə şəhərində bir həftəlik festival günlərində gördüm, şahidi oldum. O harada görünürdüsə, adamlar onu böyük sevinclə, məhəbbətlə əhatəyə alırdılar. Mən hiss eləyirdim, görürdüm ki, o özü də bu məhəbbətdən güc, enerji alır, xoşbəxt olur.

Yaşar Nuri gözəl teatr aktyorudur. Bir dramaturq kimi çox xoşbəxtəm ki, mənim Akademik Milli Dram Teatrının səhnəsində Bəhram Osmanovun quruluşunda tamaşaya qoyulmuş iki əsərimdə - “Ağqoyunlular və Qaraqoyunlular”da (1995) Ata Qaraqoyunlu və “Mesenat”da (2005) Ağamusa Nağıyev rollarında oynamışdır. Biri baş roldur, ikincisi epizodik. Bu iki rolu ilə Yaşar sübut elədi ki, həqiqətən rolun böyüyü-kiçiyi yoxdur.

Yaşar Nuri bir ömür içərisində onlarla insanın həyatını yaşayıb, oynadığı surətlərin ömrünü öz aktyor həyatına sığışdıra bilib. Onun yaratdığı rollar sayına və sanbalına görə əslində bir neçə sənətkarın yaradıcılıq bioqrafiyasına bəs edə bilərdi. Əslində bu, böyük aktyorun, nadir sənətkarın qələbəsidir.

Yaşar Nuri 60 yaşını tamam eləyir. Bu, təkcə Yaşar Nurinin, böyük aktyorun, onun ailəsinin bayramı deyil, bu, həm də bir sənət bayramıdır! Elə bu bayram münasibətilə sevimli aktyorumuzu ürəkdən təbrik edir, ona möhkəm cansağlığı arzulayıram!

Əli Əmirli,

yazıçı-dramaturq

Hazırladı: Təranə Vahid

Mədəniyyət.- 2011.- 14 oktyabr.- S. 6.