«Space» teleradio şirkəti ad gününü qeyd etdi

Fəaliyyətə başladığı ilk gündən tamaşaçı-dinləyici auditoriyasının “xəyallarını gerçəkləşdirən“ “Space” teleradio şirkəti iki əlamətdar tarixi qeyd etdi. Oktyabrın 12-də “Space” televiziyasının 14, “Space” radiosunun isə 10 yaşı tamam oldu.

Bu münasibətlə teleradio şirkətinin keçdiyi yola qısa nəzər salmaq istədim. Neçə-neçə yaddaqalan veriliş, fərqli layihə, rəngarəng konsert, baxımlı tok-şou süzüldü yaddaşımdan. Maraqlıdır ki, bu müddət ərzində tamaşaçısını yormadan, zövqünü korlamadan və həm də baxımlılığını itirmədən hər gün ekranda olmaq o qədər də asan deyil. Amma kanal və radio olaraq “Space” bunun öhdəsindən gələ bildi.

Efirində milli-mənəvi dəyərlərə önəm verən kanal sadə tamaşaçı kütləsinin marağını özündə cəmləyə bildi. Ona görə də Azərbaycan teleməkanında “Space”in öz yeri, dəst-xətti var desək, yanılmarıq. Bu mənada şənbə günləri efirə çıxan “Hər səhər”in xüsusi buraxılışının ayrı bir yeri var. Mədəniyyət və incəsənət, elm və ədəbiyyat xadimlərinin doğum günlərinin, yaradıcılıq yubileylərinin təntənə ilə qeyd olunması bütünlükdə kanalın, xalqın sənət və sənətkarına məhəbbətinin təzahürüdür.

İstedadlı rejissor Vaqif Mustafayevin rəhbərlik etdiyi “Space”in gənc nəslin tərbiyələnməsinə xidmət edən layihələri də az olmayıb. Milli rəqslərimizin geniş təbliği məqsədilə reallaşan “Azərbaycan xalq rəqsləri” tamaşaçıların sevimli proqramları sırasına daxil ola bildi. Günün müxtəlif saatlarında izləyicilərə ölkə və dünya gündəminin ən önəmli xəbərlərini peşəkarlıqla təqdim edən ”Xəbərlər” xidməti də ən baxımlı proqramlardandır.

Azərbaycan mədəniyyətinin rəngarəng mənzərəsini əks etdirən, Mədəniyyət və Turizm Nazirliyi ilə birgə layihə olan “Mədəniyyət saatı” kanalın ən sevilən verilişlərindəndir. Kanalın efirində yayımlanan “Bazar”, “Hər səhər”, “Bizim süfrə”, “Kiçik Qala”, “Muğam saatı”, “Olduğu kimi” və s. verilişlər “Space” televiziyasının uğurlu layihələrindəndir.

Bu illər ərzində “Space 104 FM” də çoxsaylı radiodalğalar içərisində özünəməxsusluğunu göstərə bilib. Radioqəbuledicini 104 FM-ə kökləyənlər gündəlik efir saatında retro mahnılardan ibarət “Düşüncələr”i, “Yanar saat”da Anarın təqdimatında duzlu-məzəli zarafatları, Gülnarın əyləncəli “Kokteyl”i, ilklərin “Təqdimat”ını, Mehriban Xanlarovanın “Seçilmişlər”ini, tanınmış jurnalist Solmaz Əmirlinin maraqlı “Ünsiyyət»ini dinləmək imkanı qazanırlar.

“Space”in ad gününə həsr olunmuş tədbirdə 104 FM radiosunun direktoru Əhməd Əsgərlə görüşüb 10 illik yubiley təəssüratını öyrəndik. 10 ildə hər an dinləyici ilə təmasda olmağın çətinlikləri ilə yanaşı bəxş etdiyi məmnunluqdan da danışan radio rəhbəri işlərini günün tələblərinə uyğun qurmağa çalışdıqlarını dedi: «Çünki radioefir bunu tələb edir. Artıq dinləyicilərin şou və yüngül formatlardan qaçdığını, onlara nə isə öyrədən, zövq aşılayan məlumatlara, musiqilərə meyl etdiklərini görürük. Əslində qloballaşma dövründə, mədəniyyətlərin qovuşduğu bir vaxtda XXI əsrin insanı həm öyrənmək, həm də əylənmək istəyir. Azərbaycan tarixindən məqamlar, elmi sahələrdəki yeniliklər barədə hazırlanan verilişlər artıq maraqla izlənir».

“Space” radiosu balaca dinləyiciləri də unutmayıb. Balacaların “Nağıl axşamı” layihəsi üzərində yenidən işləmək niyyətində olduqlarını bildirən müsahibim azyaşlıların mənəvi-estetik tərbiyəsinin əsas şərt olduğunu deyir: «Dinləyicilər bizdən çox şey gözləyir. Ona görə də daim axtarışda olmalıyıq. İnsanların musiqi zövqlərinin korlanmasının qarşısını almaq, bu axının əksinə getmək lazımdır. Solmaz Əmirlinin apardığı “Ünsiyyət”, «Düşüncələr» radio-layihələri bu mənada artıq öz sözünü deyə bilib. Ümumilikdə çalışırıq ki, Azərbaycan xalqının ən yüksək milli-mənəvi dəyərlərini təbliğ edək. Yalnız bununla ucuz mövzulardan qaçmaq, böyük mədəniyyətimizi tərənnüm etmək olar».

Həmkarlarımızı “Space” teleradio şirkətinin ad günü münasibəti ilə təbrik edir, onlara çətin və şərəfli işlərində uğurlar arzulayırıq.

Lalə

Mədəniyyət.- 2011.- 14 oktyabr.- S. 5.