Tağıyev Nurəddin Məmmədoviç

Azərbaycan mədəniyyətinə itki üz vermişdir. Azərbaycan Dövlət Rəsm Qalereyasının direktor müavini, Əməkdar mədəniyyət işçisi Tağıyev Nurəddin Məmmədoviç 2011-ci il oktyabrın 1-də, ömrünün 67-ci ilində vəfat etmişdir.

Tağıyev Nurəddin Məmmədoviç 1944-cü ildə Gürcüstan Respublikasının Tbilisi şəhərində anadan olmuşdur. 1969-cu ildə Azərbaycan Dövlət İncəsənət İnstitutunun rejissorluq fakültəsini bitirən Nurəddin Tağıyev 1991-ci ilə qədər Azərbaycan Dövlət Radio və Televiziya Komitəsində rejissor vəzifəsində çalışmışdır. Bu müddət ərzində yaratdığı 60-a yaxın sənədli film tamaşaçılar tərəfindən rəğbətlə qarşılanmışdır.

1991-ci ildən başlayaraq Mədəniyyət və Turizm Nazirliyi sistemində Bədii Sərgi Salonunun direktoru, daha sonra isə ömrünün sonunadək Dövlət Rəsm Qalereyasının direktor müavini vəzifəsində çalışmışdır. Nazirliyin xətti ilə keçirilən dövlət əhəmiyyətli tədbirlərin, dünyanın müxtəlif ölkələrində Azərbaycan Mədəniyyəti Günlərinin təşkilində fəal iştirak edərək milli incəsənətimizin təbliğində böyük xidmətlər göstərmişdir. Uzun illər göstərdiyi səmərəli fəaliyyətinə görə Nurəddin Tağıyev müxtəlif dövrlərdə fəxri fərmanlara, 2007-ci ildə isə Azərbaycan Respublikasının Prezidenti tərəfindən «Əməkdar mədəniyyət işçisi» fəxri adına layiq görülmüşdür.

İstedadlı rejissor, bacarıqlı mədəniyyət təşkilatçısı, gözəl insan Nurəddin Tağıyevin işıqlı xatirəsi onu tanıyanların qəlbində əbədi olaraq yaşayacaqdır.

Allah rəhmət eləsin.

Azərbaycan Respublikası Mədəniyyət və Turizm Nazirliyi

Mədəniyyət.- 2011.- 5 oktyabr.- S. 10.