Yaşar 100 il yaşar!

Görkəmli aktyorun 60 illik yubileyi qeyd edildi

Oktyabrın 16-da Akademik Milli Dram Teatrında görkəmli aktyor, Xalq artisti, Dövlət mükafatı laureatı, Prezident təqaüdçüsü Yaşar Nurinin 60 illik yubileyinə həsr olunmuş tədbir keçirildi.

Tədbirin iştirakçıları əvvəlcə teatrın foyesində görkəmli sənətkarın həyat və yaradıcılığından bəhs edən fotosərgi ilə tanış oldular.

Mərasimdə çıxış edən mədəniyyət və turizm naziri Əbülfəs Qarayev yubilyarın Azərbaycan teatrının inkişafı, təbliği istiqamətində gördüyü işlərdən danışdı. Qeyd olundu ki, həm teatr, həm də kinoda bənzərsiz obrazlar yaradan aktyor daim istedadı, zəhməti ilə böyük tamaşaçı alqışı qazanıb.

Sənət adamlarına göstərilən dövlət qayğısından danışan nazir bildirdi ki, Yaşar Nuri Azərbaycanda teatr sənətinin inkişafındakı xidmətlərinə görə prezident İlham Əliyevin 1 sentyabr 2011-ci il tarixli sərəncamı ilə “Şöhrət” ordeninə layiq görülüb. Sonra nazir “Şöhrət” ordenini yubilyara təqdim etdi.

Öz növbəsində yubilyar dövlət başçısına, onun sənətini qiymətləndirən hər kəsə öz təşəkkürünü bildirdi.

Əslində Yaşar Nurinin yubileyi bir aktyorun tamaşası kimi yadda qaldı. Gecə boyu sənətkar həyatının ən yaddaqalan anlarını tamaşaçılarla bölüşdü. Hazırcavablığı, yüksək yumor hissi ilə sevilən Yaşar Nuri yubileyində də özünəməxsus duzlu improvizələri, gözlənilməz cavabları ilə dəfələrlə alqışlandı.

Gecədə Teatr Xadimləri İttifaqının sədri, Xalq artisti, rejissor Azər Paşa Nemətov, xalq artistləri Ramiz Əzizbəyli, İlham Namiq Kamal və başqaları Yaşar Nurini ən səmimi arzularla təbrik etdilər. Xalq artistləri Brilyant Dadaşova, Azər Zeynalov və başqaları gözəl musiqi nömrələri ilə gecəyə rəng qatdılar.

Gecədə Yaşar Nurinin oynadığı tamaşalardan və çəkildiyi filmlərdən parçalar nümayiş olundu.

Təranə

Mədəniyyət.- 2011.- 19 oktyabr.- S. 4.