60 yaşın bərəkəti

Yaşar Nurinin sənət ömrünün hər ili tamaşaçı sevgisi ilə zəngindir

Görkəmli aktyor, sevilən sənətkar, Xalq artisti Yaşar Nuri 1951-ci il sentyabrın 3-də Bakıda tanınmış aktyor Məmmədsadıq Nuriyevin ailəsində dünyaya gəlib. Səhnəyə ilk dəfə on bir yaşında “Toy kimindir?” (dramaturq Məhərrəm Əlizadə, bəstəkar Ağası Məşədibəyov) tamaşasında Tapdıq rolunda çıxıb. Məktəbli vaxtlarında televiziyada “Yelkən” verilişinin aparıcılarından olub, “Buratino”, “Qaranquş”, “Pioner” uşaq verilişi-teatrlarında müntəzəm iştirak edib. Müxtəlif dram dərnəklərinə gedib, keçmiş 26 Bakı Komissarı adına Mədəniyyət Sarayı Xalq Teatrının tamaşalarında çıxış edib.

1968-ci ildə Bakıdakı 173 saylı orta məktəbi bitirib. Azərbaycan Dövlət İncəsənət İnstitutunun (indiki Mədəniyyət və İncəsənət Universiteti) Dram və kino aktyorluğu fakültəsinə daxil olub. Kurs rəhbərləri, tanınmış səhnə xadimləri Rza Təhmasib və Əliheydər Ələkbərovdan aktyorluq sənətinin incəliklərini öyrənib. İnstitut dövründə “Sevil”də (C.Cabbarlı) Balaş, “Toy”da (S.Rəhman) Salmanov, “Günahsız müqəssirlər” də (A.N.Ostrovski) Neznamov və s. rolları oynayıb.

1974-cü il dekabrın 1-də Akademik Milli Dram Teatrının baş rejissoru Tofiq Kazımovun dəvəti ilə bu kollektivin aktyor truppasına qəbul olunub.

Yaşar Nuri Milli Dram Teatrında işlədiyi gündən repertuarda olan bir çox tamaşalarda iştirak edib. Milli Dram Teatrının səhnəsində ilk rolu Aleksandr Vampilovun “Övlad” (“Boyuk oğul”, 28 dekabr 1974) komediyasının tamaşasında Silva rolu olub. Bundan başqa o, İlyas Əfəndiyevin “Bağlardan gələn səs” dramında Pərviz (1 oktyabr 1975), Əkrəm Əylislinin “Quşu ucan budaqlar” pyesində Qasım (29 oktyabr 1978), Mehdi Məmmədovun təfsirindəki “Dəli yığıncağı” faciəsində Sərsəm Salman (6 may 1978), Fuad və Zəminə Hacıyevlərin hazırladığı “Sevil”də Əbduləli bəy (18 noyabr 1978) və s. obrazlar yaradıb.

Teatr aktyoru kimi görkəmli sənətkar olan Yaşar Nuri həm də məşhur kino ustasıdır. 50-dək filmə çəkilib: "Yol əhvalatı", “Tənha narın nağılı”, "Yaramaz", “Bəyin oğurlanması", “Lətifə", "Qətl günü", “Yuxu”, “İstanbul reysi” və s.

Görkəmli aktyor Dövlət Televiziyasında hazırlanmış yüzdən çox tamaşada, bədii kompozisiyada, satirik səhnəciklərdə iştirak edib. Onun əsasən baş rolları ifa etdiyi teletamaşalar televiziyanın fondunda daimi sənət nümunələri kimi qorunur. Bu sırada Ramiz Həsənoğlunun quruluşunda Ruhəngiz Qasımovanın “Yollar görüşəndə...”, “Ömrün yolları”, İsi Məlikzadənin “Qatarda”, Anarın “Evləri köndələn yar”, Mövlud Süleymanlının “Kökdən düşmüş piano”, Hüseyn Cavidin “Topal Teymur”, Aslan Qəhrəmanovun əsərləri əsasında Tariyel Vəliyevin lentə aldığı “Səni axtarıram”, “Bağışla”, “Səndən xəbərsiz” trilogiyası və s. televiziya tamaşalarını misal göstərmək olar.

Yaşar Nuri 1981-ci ildə, 30 illik yubileyində ilk fəxri adını - Əməkdar artist adını alıb. 1989-cu ildə Azərbaycan Respublikasının Xalq artisti fəxri adına layiq görülüb, 1991-ci ildə 40 illik yubileyində ona “Yaramaz” filmindəki Maşallah roluna görə Dövlət mükafatı verilib, 1992-ci ildə “Qızıl dərviş” mükafatına layiq görülüb.

Aktyor özünü rejissor kimi də sınayıb. Teatrda İsi Məlikzadənin “Subaylarınızdan görəsiniz” əsərinə quruluş verib, kinoda “Spasibo” filmini ekranlaşdırıb.

Sevimli sənətkarımızı qarşıda hələ neçə-neçə rollar, teatr, kino, televiziya layihələri gözləyir. Yaşar Nurini əlamətdar yubileyi münasibətilə təbrik edir, ona, hər şeydən öncə, möhkəm cansağlığı arzulayırıq.

Mədəniyyət.- 2011.- 2 sentyabr.- S. 6.