Azərbaycan cizgi filminin beynəlxalq uğuru

Firəngiz Qurbanova: “Soçidə qazandığımız bu uğur bizi yeni işlərə ruhlandırır”

Bu yaxınlarda Rusiyanın Soçi şəhərində keçirilən XVI Beynəlxalq uşaq animasiya filmləri festivalında Əməkdar incəsənət xadimi Firəngiz Qurbanovanın rəhbərlik etdiyi “Birlik” studiyasının yaradıcı heyətinin çəkdiyi “Təmiz, natəmiz və biz” cizgi filmi (ssenari müəllifi Gülşən Tofiqqızı, bəstəkar Firudin Allahverdi) böyük uğur qazanıb.

35 ölkədən 87 animasiya ekran əsərinin iştirak etdiyi müsabiqədə Azərbaycan cizgi filmi “Yüksək professionallığa görə” nominasiyasında xüsusi mükafata və münsiflər heyətinin diplomuna layiq görülüb. Bu uğur sayəsində azərbaycanlı rejissor gələn il keçiriləcək XVII festivalda beynəlxalq münsiflər heyətinin üzvü kimi iştirak edəcək. Xatırladaq ki, Firəngiz Qurbanova 2009-cu ildə Batumidə keçirilən “Tofuzi” festivalında beynəlxalq münsiflər heyətinin sədri olub. Rejissor son festivalda əldə olunan uğur və yaradıcılıq planları barədə bunları dedi:

- “Təmiz, natəmiz və biz” cizgi filminin çəkilməsini “Mozalan” studiyası bizim yaradıcılıq qrupuna etibar etdi. Göründüyü kimi, etimadı doğrultduq, Azərbaycanın adına belə bir mötəbər tədbirdə uğur qazana bildik. Bu, gənc bəstəkar Firudin Allahverdi ilə artıq dördüncü işimizdir. Fəlsəfi məna daşıyan bu animasiya filmində personajları oğlum Cavid və onun həyat yoldaşı Zema Əhədovlar ərsəyə gətiriblər. Soçidə qazandığımız bu uğur bizi yeni işlərə ruhlandırır. Belə ki, bu il oğlum Cavidin ssenarisi əsasında olan bir cizgi filmi çəkməyi planlaşdırırıq. Hələ vaxtından əvvəl bu barədə geniş danışmaq istəmirəm. Ancaq onu deyə bilərəm ki, bu, səmada cızma-qara, rəsmlə bağlı olacaq. Ümidvarıq ki, bu animasiya filmimiz də tamaşaçılar tərəfindən rəğbətlə qarşılanacaq.

Xatırladaq ki, Firəngiz Qurbanovanın rəhbərliyi ilə “Birlik” studiyası 1989-cu ildə yaranıb. Burada “Arzu yarat”, “Akvarium”, “Bir axşam” və s. cizgi filmləri çəkilib. Firəngiz xanım Azərbaycan Rəssamlar və Kinemotoqrafçılar İttifaqının, Beynəlxalq Animasiya Filmləri Assosiasiyasının üzvüdür. Yaradıcılıq kollektivinə gələcək işlərində də böyük uğurlar qazanmağı arzulayırıq.

İradə

Mədəniyyət.- 2011.- 21 sentyabr.- S. 15.